Iordanııada Sultan Beıbarystyń jaýlaǵan qorǵany saqtalǵan - elshi

ASTANA. QazAqparat - Qazaqstan Respýblıkasynyń Iordanııa Hashımıt Koroldigindegi Tótenshe jáne Ókiletti elshisi Azamat Berdibaı qazaq tarıhynda oryny bar Sultan Beıbarystyń Iordanııa elinde qandaı iz qaldyrǵany týraly aıtyp berdi, dep habarlaıdy «QazAqparat» HAA tilshisi.

BAQ aldynda baspasóz máslıhatyn ótkizgen Azamat Berdibaı 1250 jyly áıgili Mysyr patshasy Sultan Beıbarystyń ıordanııalyq ál-Karak qalasynda jaýlap alǵan qorǵanyn kórsetti. Ol qorǵandy kirest joryǵynyń kiresshileri salǵan. Biraq keıin qorǵan Ámir Salahaddınniń jaýlaýymen musylmandardyń qolyna ótken.

««Bul jer nesimen ataqty? Tarıhty bilseńizder, mámlúkterdiń patshasy Sultan Beıbarys 1250 jyly dál osy ál-Karak qalasyn jaýlap, sol qalada turǵan. Dál osy jerde ol úlken munara turǵyzyp, jer astynda kitaphana ashqan. Bul álbette bizdiń tarıhymyzǵa da qatysty», - deıdi elshi.

Azamat Berdibaı sonymen birge, ál-Karak sekildi tarıhı oryndar Iordanııada kóp ekenin atap ótti.

«Men bul memleketti ashyq aspan astyndaǵy mýzeı dep aıtar edim. Astanasy Aman buryn Fıladelfııa atalǵan. Rımdikterdiń jaýlaýynan bastap munda kóne tarıhtyń izi saırap jatyr. Álemniń jeti keremetiniń biri - Petro qalasy da osynda. Onda jylyna mıllıon týrıst keledi. Gollıvýdtyń «Indıana Djons» fılmi sonda túsirilgen», - deıdi ol.

Elshiniń aıtýynsha, Qazaqstan azamattary Iordanııaǵa BAÁ, Túrkııa, Reseı, Ýkraına, Grýzııa elderi arqyly ushyp jete alady.