Iordanııada qazaqstandyqtardyń saılaýdaǵy belsendiligi 95,75% qurady

AMMAN. QazAqparat - Ammanda jergilikti ýaqyt boıynsha saǵat 20.00-de Qazaqstan Respýblıkasynyń Prezıdenti laýazymyna úmitkerler úshin daýys berý aıaqtaldy. Halyqtyń Iordanııadaǵy №278 saılaý ýchaskesine kelý belsendiligi 95,75% qurady. Qorytyndy nátıje bıýlletender sanalyp, rásimdelgennen keıin belgili bolady, dep habarlaıdy «QazAqparat» HAA-nyń Taıaý Shyǵystaǵy menshikti tilshisi.

Iordan Hashımıt Koroldiginiń astanasy Amman qalasyndaǵy №278 saılaý ýchaskesinde elektoraldy protsess birqalypty ótti, daýys berýshilerdiń belsendiligi joǵary boldy.

«Ammandaǵy saılaý ýchaskesinde merziminen tys QR Prezıdentin saılaýǵa 85 qazaqstandyqtyń 80-i qatysty. Iordanııadaǵy azamattarymyz el bolashaǵy úshin azamattyq jaýapkershiliktiń jáne belsendiliktiń joǵary deńgeıin kórsetti. Buǵan saılaý ýchaskesine kelý qarqyny dálel. Bes azamatymyz ózge qalalarda turýyna baılanysty saılaýǵa kele almady. Onyń ishinde Akaba, Irbıd jáne Zarka syndy alysta ornalasqan qalalar bar», - dedi №278 saılaý ýchaskesiniń hatshysy Danııar Baıbekov agenttik tilshisine.

Qazaqstanda birneshe márte saparmen bolǵan, Iordanııada jáne ózge arab elderinde tanymal ıordanııalyq sarapshy jáne jýrnalıst Mashhýr Abý Eıd qazaqstandyqtardy atalmysh saıası oqıǵamen quttyqtady.

«QR Tuńǵysh Prezıdenti N.Á.Nazarbaevtyń strategııalyq daryndylyǵy álemdik arenada eldiń zamanaýı ımıdjin anyqtady jáne halyqaralyq qarym-qatynastar júıesinde Qazaqstannyń biregeı mártebesin bekitti. Onymen qosa, is basyndaǵy Prezıdent Q.K.Toqaevtyń kezekten tys prezıdenttik saılaýdy jarııalaýy jáne onyń ótkizilýi eldegi demokratııa men qoǵamdyq kelisimdi qurýdaǵy kezeńderdiń biri boldy. Sol sebepti, Qazaqstan basshylyǵynyń merziminen buryn prezıdenttik saılaýdy jarııalaýy, onyń ótkizilýi jáne qorytyndysynyń jarııalanýy álemdegi birde-bir iri basylymnyń nazarynan tys qalmaýda», - dedi sarapshy «QazAqparat» HAA tilshisine.

M. Abý Eıdanyń pikirinshe, Qazaqstan keleshekte barlyq halyqaralyq mindettemelerdi saqtaı otyryp, kóppolıarlyq prıntsıpke, teńgerimdilikke jáne pragmatızmge negizdelgen Elbasy N.Nazarbaev negizin qalaǵan bebitshil syrtqy saıasatty ustanýǵa talpynatyn bolady.

«Biz, ıordanııalyqtar Qazaqstannyń halyqaralyq qaýymdastyqtaǵy barlyq memlekettermen qarym-qatynasy ózara qurmet, teńdik negizinde jáne ár taraptyń múddesi saqtala otyryp damıtynyna senimdimiz», - dedi sarapshy.