Iordanııada Izraılge qarsy sherýler ótti

<p>ASTANA. KAZINFORM &mdash; Seısenbi kúni keshke Ammanda Palestına halqymen yntymaqtastyqtyqtyń kezekti mıtıngisi ótti, oǵan qatysýshylar Gaza sektoryndaǵy 172 kúnnen beri jalǵasyp jatqan soǵysty tez arada toqtatýdy talap etti. Bul sherý sońǵy kúnderi Iordanııa astanasyn sharpyǵan Izraılge qarsy sherýlerdiń úshinshisi boldy.</p>

Izraıl elshiliginiń janyndaǵy Kalýtı alańynda ótken mıtıngke qatysýshylar Izraıldiń Gaza sektoryndaǵy palestınalyq HAMAS tobyna qarsy júrgizip jatqan soǵysyn alǵa tartyp, «Izraıl basqynshylyǵynyń agressııasyn» aıyptady.

Narazylyq bildirýshiler Iordanııa úkimetinen «Izraıldiń Palestına halqyna qarsy agressııasyn toqtatý» úshin naqty sharalar qabyldaýdy talap etti. Kóptegen demonstranttar HAMAS-ty qoldaıtyn urandar aıtty.

Eki myńnan astam sherýshi el astanasynyń Rabııa aýdanyndaǵy Izraıl elshiligine jaqyndamaq boldy, biraq Iordanııa polıtsııasy men jandarmerııa kúshteri olardy keri ıterip jiberdi. Aıta keteıik, Izraıldiń Iordanııadaǵy elshiliginiń qyzmetkerleri Gaza sektoryndaǵy soǵys bastalǵanda ótken jyldyń qazan aıynda evakýatsııalanǵan bolatyn. Sonymen birge Iordanııa Tel-Avıvtegi elshisin keri shaqyryp aldy.

Quqyq qorǵaý organdary qoǵamdyq tártipti buzýshylardy ustady. Iordanııa bıligi birneshe ret beıbit sherýlerge ruqsat etilgenin aıtty, biraq olar Izraılge qarsy ashýdy tártipsizdik týdyrý úshin paıdalaný áreketterine nemese Batys jaǵalaý nemese Izraılmen shekaralyq aımaqqa jetý áreketterine jol bermeıdi.

Gaza sektoryn qoldaǵan sherýler Iordanııanyń ońtústigindegi Akabana provıntsııasynda da ótip, qatysýshylar Palestına halqynyń qyrǵynyn aıyptady.

Gaza sektoryndaǵy densaýlyq saqtaý mınıstrliginiń málimetinshe, 7 qazanda bastalǵan soǵystan beri bul anklavtaǵy qaza tapqandar sany 32 414 adamǵa jetti.