Iordanııa Taıaý Shyǵystaǵy shıelenisti toqtatýǵa shaqyrady

<p>ASTANA. KAZINFORM - Jeksenbi kúni Iordanııanyń Syrtqy ister mınıstri Aıman Safadı Iranǵa saparmen baryp, óńirdegi zorlyq-zombylyqty toqtatý jáne aımaqtyń beıbitshilik, qaýipsizdik ári turaqtylyq jaǵdaıynda ómir súrýine múmkindik berýge shaqyrdy. Bul sapar barysynda Tegeranda HAMAS qozǵalysy saıası bıýrosynyń basshysy Ismaıl Hanııa mert bolǵannan keıin óńirdegi shıelenistiń ýshyǵýy máselesi sóz boldy, dep habarlaıdy Kazinform agenttiginiń menshikti tilshisi.</p>

Iordanııalyq sheneýniktiń Tegeranǵa 20 jyldaǵy alǵashqy resmı sapary

Iordanııanyń syrtqy ister mınıstri jeksenbi kúni Tegeranda Iran prezıdenti Masýd Pezeshkıanmen, osy eldiń syrtqy ister mınıstri jáne basqa da joǵary laýazymdy tulǵalarmen kezdesti. Aıman Safadıdiń sapary ırandyq áriptesiniń shaqyrýymen ótti.

Koroldiktiń Syrtqy ister mınıstrligi jasaǵan málimdemege qaraǵanda, Safadı Iran prezıdenti Pezeshkıanǵa Iordanııa Koroli II Abdallanyń óńirdegi jaǵdaı men ekijaqty qarym-qatynasqa qatysty úndeýin jetkizdi. Buǵan jaýap retinde Pezeshkıan ІІ Abdallaǵa óziniń sálemin jetkizip, Iordanııamen ártúrli deńgeıde qarym-qatynasty nyǵaıtýǵa nıet bildirdi.

Iordanııa Syrtqy ister mınıstrliginiń habarlaýynsha, kezdesýde óńirdegi qaýipti shıelenis pen HAMAS-tyń saıası jetekshisi Ismaıl Hanııanyń óliminiń saldary talqylandy. Bul turǵyda Iordanııa jaǵy I. Hanııany óltirý áreketin sumpaıy qylmys ekenin aıtyp, osy jaǵdaıdy halyqaralyq quqyqty buzý dep aıyptady.

Iran buqaralyq aqparat quraldarynyń jazýynsha, kezdesý kezinde Masýd Pezeshkıan Hanııanyń óltirý - ızraıldik rejımniń úlken qateligi bolǵanyn jáne bul oqıǵa jaýapsyz qalmaıtynyn málimdedi.

Sonymen qatar, Iordanııa jaǵy Beırýtke qarsy agressııany da aıyptap, ony Lıvannyń egemendigine qater tóndirý men halyqaralyq quqyqty buzý dep atady.

Budan bólek, Iran Syrtqy ister mınıstriniń mindetin atqarýshy Álı Bagerı Qanımen kezdesýde ekijaqty qarym-qatynas pen óńirlik máseleler de talqylandy.

Bul kezdesýden keıin Safadı Iran telearnasyna bergen suhbatynda shıelenisti toqtatý jáne óńirdi soǵystan qorǵaýǵa qatysty pikir bildirdi. Onyń paıymynsha, bul turǵyda «Izraıldiń Gaza sektoryndaǵy agressııasyn, sondaı-aq Izraıldiń adam quqyǵy men halyqaralyq quqyqty buzýy áreketin dereý toqtatýdan» bastalýy kerek.

Aıman Safadı keıingi 20 jyldan astam ýaqyt ishinde Iranǵa resmı saparmen barǵan ıordanııalyq birinshi joǵary laýazymdy sheneýnik boldy. Eger Iran jaýap qaıtarsa, Izraılmen shekaralas turǵan Iordanııa bul qaqtyǵystyń saldaryna tap bolýy múmkin.

Soǵys bolýy múmkin be?

Taıaý Shyǵystaǵy shıelenis Izraıl áskerı áýe kúshteriniń Beırýtke jasaǵan soqqysynan lıvandyq «Hezbolla» tobynyń joǵary laýazymdy áskerı jetekshisi Fýad Shýkrdiń óliminen keıin, sondaı-aq HAMAS qozǵalysy saıası bıýrosynyń basshysy Ismaıl Hanııanyń qazasynan soń ýshyǵa tústi.

Bul rette, HAMAS pen Iran jaǵy Izraıldi Hanııany óltirdi dep aıyptap, kek alýǵa ýáde berdi. HAMAS saıası bıýrosy basshysynyń ólimine qatysty Izraıl resmı túrde málimdeme jasamady.

Keıingi kezde óńirdegi aýqymdy soǵys qaýpi arta tústi. Erekshe shıelenis Izraılmen shekaralas Lıvanda baıqaldy. Beırýt áýejaıynyń termınaldaryna kóptegen jolaýshy jınalǵany habarlandy.

Senbi kúni AQSh pen Ulybrıtanııa elshilikteri óz azamattaryna Lıvannan ketýge keńes berdi, al Frantsııa jeksenbi kúni tańerteń bul usynystarǵa qosylyp, úndeý jasady.

Budan buryn habarlanǵandaı, Izraıldiń Beırýtke jasaǵan soqqysynan tórt adam qaza tapty. 

Taıaýda HAMAS basshysy Ismaıl Hanııa Qatarda jerlendi.