Iordanııa áýe kompanııalary Qazaqstannyń 11 áýejaıyna turaqty ushatyn boldy

NUR-SULTAN. QazAqparat - Iordanııanyń áýe kompanııalarynyń Qazaqstannyń 11 áýejaıyna turaqty ushýyna múmkindik berildi, dep habarlaıdy QazAqparat tilshisi.

QR IIDM Azamattyq avıatsııa komıtetiniń Facebook paraqshasynda jarııalanǵan aqparatqa sáıkes, qazaqstandyq delegatsııa Iordanııanyń avıatsııalyq bıligimen kelissózder júrgizdi.

«Iordanııanyń áýe kompanııalaryna Qazaqstannyń 11 áýejaıyna (Nur-Sultan, Almaty, Shymkent, Aqtaý, Qaraǵandy, Óskemen, Pavlodar, Kókshetaý, Taraz, Petropavl, Semeı) 5-shi «áýe erkindigin» paıdalaný múmkindigimen reıster sanyna shekteýdi alyp tastap, turaqty ushýyna múmkindik berildi. Taraptar Iordanııadaǵy elshilikpen birlesip Qazaqstannan Amman jáne Akaba qalalaryna tikeleı reıs ashý múmkindigin qarastyrýda», - dep atap ótti komıtetten.

Aıta keteıik, Qazaqstan Respýblıkasy Prezıdentiniń tapsyrmasy boıynsha engizilgen «ashyq aspan» rejımi aıasynda QR Indýstrııa jáne ınfraqurylymdyq damý mınıstrligi Qazaqstannyń Iordanııadaǵy Elshiligimen birlesip jańa halyqaralyq baǵyttar ashý jáne jańa sheteldik áýe kompanııalardy tartý boıynsha belsendi jumys júrgizip jatyr.