Investorlardyń quqyǵyn qorǵaýǵa baǵyttalǵan mamandandyrylǵan sot qurylady

ASTANA. QazAqparat - Azamattyq is-júrgizý kodeksi jobasynda ınvestorlardyń quqyn qorǵaý boıynsha mamandandyrǵan sot quramyn engizý kózdeledi. Bul týraly búgin Májiliste jańa redaktsııadaǵy Azamattyq is-júrgizý kodeksi jobasynyń tanystyrylymy barysynda Zańnama jáne sot-quqyqtyq reforma komıtetiniń tóraǵasy Rahmet Muqashev málim etti.

«Kodeks jobasyndaǵy erekshelikterdiń biri ınvestorlar quqyǵyn qorǵaý jónindegi mamandandyrylǵan sot quramyn engizý bolyp tabylady. Osyǵan baılanysty Joǵarǵy Sottyń mamandandyrylǵan alqasyn qurý kózdeledi. Al Astana qalalyq sotynda ınvestıtsııalyq daýlardy qaraý jónindegi mamandandyrylǵan sot qalyptaspaq. Bul shara negizinen ınvestıtsııalyq quqyqtardy qorǵaýdyń deńgeıin arttyrýǵa baǵyttalǵan», - dedi R. Muqashev.

Onyń aıtýynsha, mundaı normalar buǵan deıingi zańnamada kórsetilmegen. Sonymen qatar, kodeks jobasynda azamattyq is júrgizý baǵytynda aqparattyq tehnologııalardy qoldaný múmkindikterin keńeıtý de kózdelip otyr.

Aıta keteıik, QR Joǵarǵy soty ázirlegen Azamattyq is-júrgizý kodeksi 60 bólimnen 532 baptan turady. Qujatta qoldanystaǵy birqatar bólimder alynyp, jańa normalar engizilgen. Degenmen, azamattyq is-júrgizýdiń bazalyq ınstıtýty men prıntsıpteri, sonyń ishinde sot júıesiniń úshbýyndylyǵy, sot aktileriniń qaralý satylary, sottar men sýdıalardyń mamandanýy, óndiristiń birqatar túrleri saqtalady.