Investorlardy kabınetter arasynda sandaltýdy doǵarý kerek - BQO ákimi

ORAL. QazAqparat - Investorlardy kabınetter arasynda sandaltýdy doǵarý kerek. Bul týraly oblys ákimi Altaı Kólginov memlekettik jáne jekemenshik seriktestigin damytý boıynsha aýdandarmen ótken selektorlyq jıynda málim etti, dep habarlaıdy «QazAqparat» HAA tilshisi.

Onyń aıtýynsha, óńirde qazirdiń ózinde apatty úılerdiń ornyna jańa úıler salý, balabaqshalar qurylysyn júrgizý, «Aqyldy qala» boıynsha beınekameralar ornatý sııaqty naqty 10-ǵa jýyq joba bar. «Kásipkerlerdiń talaby men qujattar jaǵynan durys júrgizilýin qamtamasyz etemiz dep memlekettik organdar tóreshildikke jol berip jatady. Qaı salaǵa bolmasyn qarjy salýǵa nıetti kásipkerge ózimiz kómek berýimiz qajet. Kabınetter arasynda bos sandaltyp qoımańyzdar», dedi óńir basshysy aýdan ákimderi men basqarma basshylaryna.

Aıta keteıik, Oral qalasynda memlekettik jáne jekemenshik seriktestigi aıasynda apatty jaǵdaıdaǵy turǵyn úılerdi buzý jumystary bastalyp ketti. Ótken ǵasyrda boı kótergen 2 qabatty eski úılerdiń ornyna páterleriniń aýmaǵy keń 9 qabatty turǵyn úıler salynbaq.

«Qurylys kompanııalary salǵan kóp qabatty turǵyn úı aldymen buzylǵan úıdiń páter ıelerine beriletin bolady. Al qalǵan páterlerdi merdiger kompanııa ózderi qala turǵyndaryna satady. Injenerlik jelilerdi tartý men abattandyrý jumystaryn biz moınymyzǵa alamyz. Ótken jyldy qosa eseptegende, osyndaı apattyq jaǵdaıdaǵy on úıdiń ornyna jańa úıler boı kóterýde. Jalpy, oblys ortalyǵynda apatty jaǵdaıdaǵy 41 turǵyn úı bar, olarda 1500 adam (300-den astam otbasy) turady. Aldaǵy úsh jyl ishinde kezeń-kezeńimen sol úılerdi jańalaımyz dep josparladyq», - dedi oblys ákimi Altaı Kólginov.

Oblys ortalyǵyndaǵy bul jumystar aýdandarǵa da qozǵaý salyp otyr. 

Sonymen qatar oblys ortalyǵynda memleket jáne jekemenshik seriktestigi aıasynda 550 mln. teńgege 200-den asa beınekameralar ornatylmaq. Bul «Qaýipsiz qala» baǵdarlamasyna sáıkes júrgiziledi. Qýat únemdeý maqsatynda «Jaıyqjylýqýat» AQ men «Batys sý arnasy» JShS-nyń eskirgen qondyrǵylaryn jeke ınvestorlar esebinen jańartý kózdelýde.

Aýdan basshylarynyń jobalaryn tyńdaǵan oblys ákimi Altaı Kólginov: «Aıtqandaryńyz, árıne, qulaqqa jaǵymdy estiledi, alaıda nátıjeli jumys kerek. Árbir aýdan naqty jobalaryn bekitý qajet, Oral men Aqsaı qalalarynda jobalar odan da kóp bolýy tıis», dedi.