Investorlar úshin memlekettik qoldaý sharalarynyń biryńǵaı tsıfrlyq platformasyn engizý qajet — Premer
«Taǵy bir mańyzdy másele — jergilikti qamtý úlesin ulǵaıtý. Investorlardyń, kvazımemlekettik sektordyń satyp alý rásimderinde otandyq taýarlar men qyzmetterdiń úlesin barynsha ulǵaıtý qajet. Otandyq óndiristi damytý, shaǵyn jáne orta bıznesti qoldaý, jańa jumys oryndaryn qurý — bizdiń negizgi basym mindetterimizdiń biri. Investorlar da ony iske asyrýǵa belsendi úles qosa alady. Memleket ınvestorlarǵa aıtarlyqtaı qoldaý kórsetip otyr», — dedi Premer-Mınıstr.
Úkimet basshysynyń atap ótýinshe, olar da óz tarapynan ónimdilikti arttyrý, eńbek qaýipsizdigin qamtamasyz etý, jergilikti kadrlardy oqytý, taýarlar men qyzmetterdiń eksportyn jáne básekege qabilettiligin arttyrý boıynsha qarsy mindettemelerdi oryndaýǵa tıis.
«Agroónerkásip kesheni salasyndaǵy sýbsıdııalaý tásilderi de ózgertýdi qajet etedi. Qoldanystaǵy praktıka sharýalardy ozyq agrotehnologııa men ınnovatsııany tartýǵa yntalandyrmaıdy. Osylaısha, bólingen aqshanyń qaıtarymy bilinbeı qalady. Jer ýchaskelerin alý, ınfraqurylym jetkizý rásimderiniń uzaq ári qurylys normalarynyń kúrdeli bolýy — munyń barlyǵy ınvestıtsııalyq ahýalǵa teris áserin tıgizedi. Memleket qoldaý sharalaryna orasan kóp qarajat bólip otyrǵanymen, jeke kapıtaldy tartý múldem jetkiliksiz. Bul iske otandyq bankter men halyqaralyq qarjy ınstıtýttarynyń qatysýy da mardymsyz. Osyǵan baılanysty qosymsha qarjylandyrý kózderin tartý boıynsha pármendi sharalar qabyldaý kerek. Onyń ústine, memlekettik organdar men damý ınstıtýttary arasynda ózara úılesimdi is-qımyldyń joqtyǵynan ınvestorlar memlekettik qoldaý sharalary týraly aqparatty bile bermeıdi», — dedi Oljas Bektenov.
Onyń sózine qaraǵanda, ınvestorlardyń kópshiligi Qazaqstan Damý banki nemese Damý sııaqty birneshe ınstıtýtty ǵana biledi.
«Memlekettik qoldaý sharalaryn usynýdyń biryńǵaı bazasy jáne olardyń tıimdiligin baǵalaý júıesi joq. Investorlarǵa yńǵaıly bolýy úshin memlekettik qoldaý sharalarynyń biryńǵaı tsıfrlyq platformasyn engizý qajet. Bul másele tym sozylyp ketti. Ákimshilik rásimderge arnalǵan tsıfrlyq qyzmetterdiń bolýy — ınvestorlar úshin mańyzdy. Mysaly, qyzmetterdi „bir tereze“ onlaın-mehanızmi arqyly qoljetimdi etýge bolady. Biz muny burynnan aıtyp kelemiz. Biraq, nátıje shamaly. Kórip otyrǵanymyzdaı, problemalar bar jáne biz osy baǵyttaǵy jumysty tez arada bir júıege túsirip, jeńildetýimiz kerek», — dedi ol.