Investorlar úshin Qazaqstan ken oryndarynyń ınteraktıvti kartasy jasalyp jatyr

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi qolda bar geologııalyq málimetterge jańa tehnologııalardyń kómegimen qaıta taldaý jasamaqshy. Mınıstr Serikqalı Brekeshev QR Prezıdenti Teleradıokeshininiń «Úsh suraq» baǵdarlamasyna bergen suhbatynda osyndaı málimet aıtty, dep habarlaıdy QazAqparat tilshisi.

«Geologııalyq málimetterdiń ashyqtyǵy men qoljetimdigi týraly aıtsaq, bul jumysty endi Tsıfrlyq damý mınıstrligimen birlesken joba aıasynda jalǵastyramyz. Biryńǵaı platformanyń ataýy bolady. Ol júıeniń negizin bizdegi geologııalyq málimetter alynady. Ári qaraı oǵan Indýstrııa, Energetıka mınıstrlikteriniń aqparattyq júıeleri sııaqty jer qoınaýymen baılanysty resýrstar qosylady», - dedi Serikqalı Brekeshev.

Sondaı-aq ol «QazNedra» júıesi qalaı jumys isteıtinin túsindirdi.

«Munyń arqasynda biz tolyǵymen avtomattandyrylǵan protsesterge qol jetkizemiz. Mysaly, jer qoınaýyn ıgerýshiniń qandaıda bir jer telimine nemese paıdaly qazba túrine nazary aýsa, ınteraktıvti kartaǵa kirip, jerdiń geografııalyq sıpaty boıynsha nemese paıdaly qazbalar katalogy boıynsha izdeý júrgizedi. Mys ken oryndaryn izdedi deıik. Kartadan qandaı ken orny bos ekenin, qandaı oryn ıgerilip jatqanyn kóre alady. Telim bos bolsa, ınteraktıvti kartadan qajetti geologııalyq málimettiń bárin alyp shyǵa alady. Eger barlaý jobasyn qolǵa alsa, kezekke turý tártibi arqyly ótinish beredi. Al kenishti ıgerý lıtsenzııasyn alǵysy kelse, aýktsıonǵa qatysady», - dedi vedomstvo basshysy.

Suhbat barysynda Serikqalı Brekeshev atalǵan ınteraktıvti karta sheteldik ınvestorlarǵa da qoljetimdi bolatynyn atap ótti. Kez kelgen áleýetti ınvestor álemniń kez kelgen núktesinde otyryp-aq, Qazaqstandaǵy ıgerilmegen ken oryndary týraly málimetti oqyp, tanysa alatyn kórinedi.

«Investıtsııa tartý úshin, jalpy ınvestorlarǵa keshendi qoldaý kórsetý úshin biz Memleket basshysynyń tapsyrmasymen Ulttyq geologııa qyzmetin qurdyq. Kópfýnktsıonaldy geoaqparattyq servıs bazasyna zamanaýı baǵdarlamalar satyp alynady. Ol baǵdarlamalardyń kómegimen búginge deıin jınaqtalǵan geologııalyq-fızıkalyq málimetterge jańasha taldaý jasap, qaıtadan tápsirleýge bolar edi. Qazir qolymyzda bar málimetterdiń ózin taldaýdyń arqasynda ǵana 100-ge tarta keleshegi bar telimdi ıgerýge usyna alamyz dep oılaımyn», - dedi mınıstr.

S.Brekeshev «Úsh suraq» baǵdarlamasynda, sondaı-aq kıikter sanyn retteý, aýyl sharýashylyǵy tehnıkasyna beriletin ýtıldik jeńildik sertıfıkatynyń merzimin uzartýǵa qatysty suraqtarǵa jaýap berdi.

Vıdeodan alynǵan kadr