Investorlar «Samuryq-Qazynanyń» kompanııalaryna qyzyǵyp otyr - Serik Jumanǵarın

ASTANA. QazAqparat - «Samuryq-Qazynanyń» aktıvterin satýdan 3,5-5 mlrd AQSh dollary túsedi. Bul týraly QR Ulttyq ekonomıka vıtse-mınıstri Serik Jumanǵarın Úkimet úıinde ótken baspasóz máslıxatynda aıtty, dep xabarlaıdy QazAqparat tilshisi.

Serik Jumanǵarınniń aıtýynsha, ınvestorlar «Samuryq-Qazyna» qoryna qarasty 47 kompanııany satyp alýǵa múddeli. Atalǵan aktıvter IPO arqyly satylady.

«Sonyń ishinde «Qazaqstan temir joly», «QazMunaıGaz», «Qazatomóndiris», «Samuryq-Energo», «Eır Astana», «Qazposhta», «Taý-ken Samuryq» jáne taǵy basqa kompanııalar bar. Negizi, tıisti sheshimder durys qabyldansa, «Samuryq-Qazynanyń» aktıvterin satýdan 3,5-5 mlrd AQSh dollary túsedi degen boljam bar. Bul - óte kóp aqsha», - dedi S.Jumanǵarın.

Vıtse-mınıstrdiń aıtýynsha, saýda-sattyqtan túsken aqshanyń bári Ulttyq qorǵa aýdarylatyn bolatyn. Biraq dál qazir kvazımemlekettik sektordyń kásiporyndaryn satý jáne odan túsken aqshany Ulttyq qorǵa aýdarý tártibi ázirlenip jatyr. Úkimet qaýlysynan keıin kvazımemlekettik sektordyń aqshasy qorǵa quıyla bastaıdy.

«Atalǵan qordy basqarý jónindegi arnaıy keńes bar. Atalǵan organ ary qaraı aqshany ınvestıtsııalaý jaǵyn sheshedi, qundy qaǵazdar jáne taǵysyn taǵy. Negizgi maqsat - Ulttyq qordyń aqshasyn kóbeıtý», - dep atap kórsetti S.Jumanǵarın.

Aıta ketken jón, osy ýaqytqa deıin respýblıkalyq kásiporyndardy jekeshelendirýdiń nátıjesinde 367 kásiporyn satyldy. Odan 164 mlrd teńge paıda tústi. Qarjy mınıstrliginiń málimetine sáıkes, ol aqshanyń 7 mıllıardy Ulttyq qorǵa aýdaryldy. Qańtardyń aıaǵynda taǵy 5 mlrd túsýi tıis.