Investorlar qandaı ákimshilik kedergilerge jıi tap bolady

<p>ASTANA. KAZINFORM &ndash; Bas prokýratýra ınvetorlar jıi tap bolatyn negizgi ákimshiligi kedergilerdi atady.</p>

«Prokýrorlardyń nazarynda 32 trln teńgeden asatyn 770-ten astam joba bar. Olar – iri ınvestorlar men Jalpyulttyq pýldyń jobalary», - dep atap ótedi Bas prokýratýradan agenttiktiń resmı saýalyna oraı.

Qadaǵalaýshy organnyń málimetinshe, prokýrorlyq súıemeldeýdiń barysynda ınvestorlar jıi tap bolatyn mynadaı ákimshilik kedergiler anyqtalǵan:

- jer máseleleri boıynsha sheshimder qabyldaý kezindegi kúrdelilik jáne artyq formaldylyq (onyń ishinde menshik quqyǵyn anyqtaýdaǵy túsiniksizdik) – 38%;

- ınfraqurylymnyń bolmaýy nemese qoljetimsizdigi – 27%;

- ruqsat berý qujattaryn alý jáne sheshimder qabyldaý barysynda shyǵarylǵan sheshimderdiń áýre-sarsańdyǵy men kelispeýshiligi - 15%; 

- salyq salý júıesindegi ózgeristerdiń boljamsyzdyǵy jáne salyqtyq baqylaýdy júrgizýdiń ártúrli tájirıbeleri – 10%. 

«Bulardyń basym kópshiligi jasandy jáne atalǵan máselelerdiń árqaısysynyń ósý/tómendeý dárejesi memlekettik apparattyń olardy baqylaý jáne joıý qabiletine baılanysty. Osy turǵyda «ınvestorlarǵa qatysty prokýrorlyq súzgi» (tekserýlerdi taǵaıyndaý, ákimshilik óndiristerdi qozǵaý, shekteýlerdi qoldaný, ruqsattardy berýden bas tartý jáne uzartý týraly memlekettik organdardyń sheshimderin prokýrorlarmen kelisý) óziniń tıimdiligin kórsetti», - dedi prokýratýradan.