Investıtsııa tartý isinde bıýrokratııaǵa múlde jol joq – Memleket basshysy
«Men jýyrdaǵy Joldaýymda 2029 jylǵa qaraı ulttyq ekonomıka kólemin eki ese, ıaǵnı 450 mıllıard dollarǵa deıin ulǵaıtý jóninde mańyzdy mindet júktedim. Bul mindet — bos qııal emes, Úkimettiń muqııat eseptegen is-qımyl jospary. Ony oryndaý úshin jańa ınvestıtsııalyq tsıkldi iske qosý qajet. Ol el ekonomıkasynyń mańyzdy elementine aınalady», — dedi Qasym-Jomart Toqaev.
Memleket basshysy ótken aptada ınvestıtsııa tartý jumystarynyń tıimdiligin arttyrý týraly jarlyqqa qol qoıǵanyn eske saldy.
«Endi ınvestıtsııalyq shtabtyń jumysy jobalardy ýaqytyly jáne kedergisiz júzege asyrýǵa baǵyttalady. Shtabqa zańdy kúshi bar, ýaqytsha normatıvtik quqyqtyq aktilerdi ázirleý quqyǵy berildi. Oǵan sheshimder qabyldaýǵa quzyret berý asa mańyzdy. Ony memlekettik organdar men ulttyq kompanııalar mindetti túrde oryndaýy kerek. Mundaı sharalar elimizdegi ınvestıtsııalyq klımatty jaqsartýǵa yqpal etýdi kózdeıdi. Bul jumys Investıtsııalyq shtabtyń barlyq múshesine jeke-jeke jaýapkershilik júkteıdi», — dedi Prezıdent.
Qasym-Jomart Toqaev ınvestıtsııa tartý isinde «bıýrokratııaǵa múlde jol joq — barynsha naqty is-áreket» qaǵıdaty basshylyqqa alynýy qajet ekenin qadap aıtty.
«Qolǵa alynǵan istiń nátıjesi memlekettik apparattyń jiti nazarynda bolýǵa tıis. Ózderińizge málim, meniń tapsyrmama sáıkes, óńdeý sektoryna qarjy salatyn ınvestorlar kelesi jyldan bastap úsh jylǵa salyqtan bosatylady. Buryn-sońdy mundaı júıeli sharalar bolmaǵan ári onyń sheshýshi sıpaty bar. Áıtpese, ınvestıtsııa úshin óte joǵary halyqaralyq básekelestik qalyptasyp turǵan jaǵdaıda kózdegen maqsatqa qol jetkizý qıynǵa soǵady», — dedi Memleket basshysy.