Investıtsııalyq jobalar boıynsha baqylaý kúsheıtiledi – Qarjy mınıstri

ASTANA. QazAqparat – Kvazımemlekettik sektor sýbektileri qarajatynyń ıgerilýine monıtorıng júrgizý máselesi jańa Bıýdjet kodeksinde qarastyrylady. Bul týraly Parlament palatalarynyń birlesken otyrysynda Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qarastyrý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Óńirlerdiń bıýdjet qarajatyn paıdalaný tıimdiligine qatysty jeke toqtalyp óteıin. Joǵary aýdıtorlyq palatanyń usynymdaryna sáıkes, bıýdjettiń atqarylý monıtorıngi durystalady jáne nátıjelerge qol jetkizý, ásirese ınvestıtsııalyq jobalar boıynsha baqylaý kúsheıtiledi. Sondyqtan biz bul máselelerdi múddeli memlekettik organdarmen qosymsha pysyqtaıtyn bolamyz», - dedi E. Jamaýbaev.

Munymen qosa mınısmtr kvazımemlekettik sektor máselesine toqtaldy.

«Qazirgi kezde Úkimet Dúnıejúzilik bankpen birlesip kvazımemlekettik sektordy reformalaý boıynsha keshendi jumys eskerilgen. Olar OESR ozyq tájirıbeleri men standarttaryna sáıkes keledi. Nátıjesinde tıimdi, yqsham jáne ashyq kvazımemlekettik sektor qalyptasatyn bolady.

Bul rette dıvıdendtik saıasat ta qaıta qarastyrylady. Kvazımemlekettik sektor sýbektileri qarajatynyń ıgerilýine monıtorıng júrgizý jáne olardyń eseptiligine qatysty másele jańa Bıýdjet kodeksinde qarastyrylady», - dedi vedomstvo basshysy.

Budan buryn habarlanǵandaı, mınıstr byltyr memleket óziniń áleýmettik jáne basqa da mindettemelerin tolyq kólemde oryndaǵanyn aıtty.