Investıtsııalyq daýlardy sheshý boıynsha mamandandyrylǵan sottar engiziledi

ASTANA. QazAqparat - Investıtsııalyq daýlardy sheshý boıynsha mamandandyrylǵan sottar engiziledi. Bul týraly búgin Senattyń Konstıtýtsııalyq zańnama, sot bıligi jáne quqyq qorǵaý organdary komıtetiniń keńeıtilgen otyrysynda QR Joǵarǵy sotynyń sýdıasy Ulbolsyn Súleımenova málim etti. Esterińizge sala keteıik, komıtet otyrysynda Azamattyq protsestik kodeks jobasy talqylanǵan bolatyn.

«Kodeks jobasy aıasynda ınvestıtsııalyq daýlardy sheshý boıynsha mamandandyrylǵan ınvestıtsııalyq sot qurý kózdeledi. Bul rette Joǵarǵy sottaǵy ondaı alqada iri ınvestorlardyń qatysýymen bolǵan daýlar qarastyrylatyn bolady. Al Astana qalasyndaǵy mamandandyrylǵan sotta basqa da ınvestıtsııalyq daýlar qaralady. Bundaı sottar negizinen ınvestorlardyń qazaqstandyq ádilsot júıesine degen senim deńgeıin arttyrý jáne elimizdegi ınvestıtsııalyq klımatty jaqsartý maqsatynda júzege asady», - dedi Joǵarǵy sot sýdıasy Ulbolsyn Súleımenova.

Budan bólek, jańa kodeks normalaryna sáıkes, sottardy qaǵazbastylyqtan aryltyp, sot úderisin ońaılatyp ári shapshańdatatyn jańa tehnologııalar da qoldanyla bastaıdy. Joǵarǵy sot sýdıasynyń aıtýynsha, mundaı tehnologııalar ázirdiń ózinde de is júzinde qoldanylýda. Máselen, aıǵaqtar usyný, dálelderdi zertteý, kýágerlerdi suraý protsesterinde ony beınebaılanys arqyly júzege asyrý joldary qarastyrylǵan.

«Sonymen qatar qazir barlyq sot aktileri, habarlamalar elektrondyq poshta arqyly joldanyp keledi. Árıne, protsestik qolbaılaýshylyqtar belgili bir jerlerde barshylyq, degenmen onyń aldyn alýdamyz. Qazir barlyq sottar tıisti elektrondyq tehnologııamen jabdyqtalǵan», - dedi U.Súleımenova.