Investıtsııalar tartý jónindegi úılestirý keńesine qandaı ókilettikter beriledi

NUR-SULTAN. QazAqparat - Jańa keńeske qandaı ókilettikter beriletinin Úkimet otyrysynda Syrtqy ister mınıstri Beıbit Atamqulov atady, dep habarlaıdy QazAqparat tilshisi.

«QR Premer-Mınıstriniń tóraǵalyǵymen qurylǵan keńestiń quramyna negizi memlekettik organdardyń, ulttyq kompanııalardyń, sot pen kúshtik qurylymdardyń ókilderi kiredi. Keńes iri jáne orta ınvestorlardyń máselelerin qarastyryp, sol boıynsha sheshim qabyldaıdy. Keńeske erekshe salyq rejımin, ken oryndaryn usyný (ınvestorlarǵa - avt.), shetelden jumys kúshin tartý úshin jeńildikterdi, jer ýchaskelerin bólý, ınfraqurylym júrgizý sekildi ókiletterdi berý - ınvestorlardy tartý máselelerin jedel túrde sheshý múmkindik beredi», - deıdi Beıbit Atamqulov.

Mınıstrdiń aıtýyna qaraǵanda, qazirgi ınvestorlarmen jumysty kúsheıtý jáne problemalyq suraqtardy sheshý úshin Úkimet basshysy Asqar Mamınnyń ınvestıtsııalyq ombýdsmen bolyp taǵaıyndalýyn qoldaıtynyn jetkizdi.

«Jalpy, usynylǵan ınvestıtsııalardy tartý jumysyn jańa deńgeıge shyǵarýǵa múmkindik beredi. Elbasy Nursultan Nazarbaev jumys atqaryp jatqan ınvestorlardy joǵaltpaýdy, jańa ınvestorlardy tartý týraly tapsyrma qoıǵanyn atap ótkim keledi. Mınıstrlik ınvestıtsııalardy tartý boıynsha barlyq jumysty úılestirýdi jalǵastyrady», - deıdi Beıbit Atamqulov.

Eske sala ketsek, buǵan deıin elimizde Premer-Mınıstr Asqar Mamınnyń tóraǵalyǵymen elimizde ınvestıtsııalar tartý jónindegi úılestirý keńesi qurylǵanyn habarlaǵan edik.

Aldaǵy ýaqytta Investıtsııalar boıynsha jaýapty sheshimderdi Úılestirý keńesi qabyldaıtyn bolady.