Investıtsııa tartý josparyn oryndamaǵan memlekettik qyzmetshilerge qandaı shara qoldanylady

ASTANA. QazAqparat – Ulttyq ekonomıka mınıstri Álibek Qýantyrov ınvestıtsııa tartý salasynda nysanaly ındıkatordy oryndaı almaǵan óńirlerdegi jaýapty qyzmetshiler qandaı jaýapkershilikke tartylatynyn aıtty, dep habarlaıdy QazAqparat tilshisi.

«Bıyl jospar boıynsha negizgi kapıtalǵa 18,3 trln teńge ınvestıtsııa salynýy kerek. Osy ındıktor aıasynda salalar men óńirlerdiń úlesi eskerilgen. Bıylǵy tórt aıdaǵy jospar boıynsha tıisti kórsetkish keıbir óńirlerde oryndalsa, Ulytaý óńirinde 52 paıyz deńgeıinde ǵana atqarylǵan. 60%-ǵa deıingi kórsetkishke jetkize almaǵan óńirler «qyzyl aımaqta» (joǵary táýekel dárejesi) turady», - dep jaýap berdi Álibek Qýantyrov Senatta ınvestıtsııa salasynda sońǵy oryndardan kóringen óńir ákimderine qatysty qandaı jaýapkershilik qarastyrylǵanyn suraǵan tilshilerge.

Onyń aıtýynsha, belgilengen jospardy oryndaı almaǵan tıisti qyzmetshiler jaýapqa tartylady.

«Olar bul jumysty jyldyń sońyna deıin kúsheıtýi kerek. Negizinen obektıvti sebepter bar. Óıtkeni, keıbir óńirlerde ınvestıtsııanyń basym bóligi ekinshi jartyjyldyqtan bastap tartylýy múmkin. Bul jumystar qurylysqa qatysty bolýy yqtımal. Ulytaýdyń klımattyq ereksheligine qarasaq, bul óńirde qysta ınvestıtsııa salý qıyn bolady. Sondyqtan, tıisti jumystar jyl sońyna deıin oryndalady, ıaǵnı olar bul saladaǵy jaǵdaıdy túzetýi kerek. Eger tıisti kórsetkishti oryndaı almasa, jaýapty qyzmetshiler tártiptik jaýapkershilikke tartylady», - dedi mınıstr.

Aıta keteıik, 27 mamyrda Premer-Mınıstr Álıhan Smaıylov Investıtsııalyq shtab otyrysyn ótkizgen bolatyn. Onda negizgi kapıtalǵa ınvestıtsııalar (NKI) jáne tikeleı sheteldik ınvestıtsııalar (TShI) tartý barysy qaralǵan edi.

Premer-Mınıstr 4 aıdyń qorytyndysy boıynsha oblystar men ortalyq memlekettik organdardyń deni negizgi kapıtalǵa ınvestıtsııalar boıynsha kórsetkishterdi qamtamasyz etkenin, alaıda 8 óńirdiń nysanaly ındıkatorlarǵa qol jetkize almaǵanyn atap ótti. Aýtsaıderler – Ulytaý (52%), Abaı (64%) jáne Jambyl (65%) oblystary.

«Ulytaý jáne Jambyl oblystary byltyr da jospardy oryndamaǵan. Atalǵan oblystardyń ákimderi buǵan deıin Investıtsııalyq shtab otyrysynda jaǵdaıdy bıyl túzeımiz dep ýáde bergen bolatyn. Biraq, kórip otyrǵanymyzdaı, bul óńirler barlyq oblystyń ishinde eń sońǵy oryndarda qalyp otyr», - dedi Álıhan Smaıylov.