Interpolda jańa prezıdent saılandy

NUR-SULTAN. QazAqparat - Túrkııada Halyqaralyq qylmystyq polıtsııa uıymynyń Bas Assambleıasy – Interpoldyń 89-shy sessııasy ótip jatyr, alqaly jıynǵa qazaqstandyq delegatsııany Іshki ister mınıstri Erlan Turǵymbaev bastap bardy, dep habarlaıdy QazAqparat Polisia.kz saıtyna silteme jasap.

Assambleıanyń sońǵy kúni osy uıymnyń Atqarýshy komıtetine basshy laýazymdarǵa saılaý ótti. Interpoldyń jańa prezıdenti bolyp kópshiliktiń daýysymen Birikken Arab Ámirlikteriniń ókili Ahmad Naser Ál-Reısı saılandy. Sonymen qatar, delegatsııalar ókilderiniń jalpy daýys berýi arqyly Mıkronezııa Federatıvtik Shtattary Interpoldyń jańa 195-shi múshesi boldy.

Sessııanyń qorytyndy kúninde uıymnyń aǵymdaǵy jáne kelesi eki jylǵa arnalǵan qarjy bıýdjeti qaralyp, jumystyń jańa ádisteri, onyń qyzmetiniń negizgi baǵdarlamalary jáne qazirgi zamanǵy syn-tegeýrinder men qaýipterge qarsy kúrestegi ózara is-qımyldyń ózge de ózekti máseleleri talqylandy. Erlan Turǵymbaev Interpoldyń jańadan saılanǵan prezıdenti Ahmad Naser Ál-Reısımen ekijaqty kezdesý barysynda yntymaqtastyq, onyń ishinde transulttyq qylmysqa, zańsyz kóshi-qonǵa, adam saýdasyna qarsy is-qımyl, qylmyskerlerdi ustaý, kıberqaýipsizdik, aqparat almasý jáne basqa da máselelerdi talqylady.
Sonymen qatar, Ahmad Naser Ál-Reısı Qazaqstannyń Іshki ister mınıstrin kelesi jyldyń aqpan aıynda BAÁ-de ótetin jyl saıynǵy polıtsııa kórmesine shaqyrdy. Kórme polıtsııa qyzmetinde qoǵam qaýipsizdigine arnalǵan jańa jabdyqtardy, tehnologııalar men materıaldardy kórsetýge, azamattardy qorǵaý jáne olarǵa kómektesý, sondaı-aq qyzmetkerlerdi oqytý jáne biliktiligin arttyrý salalaryna arnalady.