Internetti aýyl úılerine tartý jumystary sýbsıdııalanady

NUR-SULTAN. QazAqparat – Aýyl úılerine ınternet tartý baǵytynda sýbsıdııa eskerilmek. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

«Qazirgi ýaqytta aýyldyq eldi mekenderde symdy telefonııa qyzmetteri men poshta qyzmetteri jyl saıyn 8 mlrd teńgege sýbsıdııa alýda. Biz endi ınternetti aýyl úılerine deıin jetkizý úshin telekom operatorlaryn yntalandyrý retinde optıkalyq baılanys jáne basqa tehnologııalar arqyly qosylǵan ınternetti úıge jetkizýdi sýbsıdııalaıtyn bolamyz», - dedi mınıstr tsıfrlandyrý taqyryby boıynsha Senatta ótip jatqan Úkimet saǵatynda.

Nátıjesinde, aýyldyq eldi mekenderdiń turǵyndary qazirgi zamanǵy kórsetiletin qyzmetterge qol jetkizýge múmkindik alady.

Budan buryn habarlanǵandaı, B. Mýsın qaladaǵy turǵyn úı keshenderin ınternetsiz paıdalanýǵa berýge tyıym salý josparlanyp otyrǵandyǵyn aıtqan edi.