Internetten pornografııa, esirtki men sýıtsıdti nasıhattaıtyn 10 myń zańsyz materıal tabyldy

ASTANA. QazAqparat – Byltyrǵa qańtardan beri elimizde pornografııany, esirtki men sýıtsıdti nasıhattaıtyn 10 myńnan astam zańsyzdyq tirkelgen. Bul týraly Premer-Mınıstrdiń orynbasary Altaı Kólginov Májilis depýtattarynyń LGBT ıdeologııasymen kúres týraly saýalyna bergen jaýabynda aıtylǵan, dep habarlaıdy QazAqparat tilshisi.

«Qoǵam sanasyna teris áser etýi múmkin aqparattyń taralýyn boldyrmaý jáne mádenı-otbasylyq qundylyqtar men adamgershilik qasıetterdi nasıhattaý, sondaı-aq qoǵamdy, ásirese balalardy dástúrli emes ıdeologııadan qorǵaý maqsatyndaǵy jumys belsendi júrip jatyr. Buqaralyq aqparat quraldaryna júrgizilgen monıtorıng nátıjesinde Qazaqstan halqynyń ǵasyrlar boıǵy dástúrleri men ulttyq qundylyqtaryn buzýǵa baǵyttalǵan materıaldar tirkelmedi. Sondaı-aq, telearnada azǵyndyqty nasıhattaıtyn jáne qoǵamǵa moraldyq zııan keltirýge shaqyratyn baǵdarlamalarǵa jol berilmeıtinin atap ótken jón. Memlekettik organdar arqyly ınternet keńistigine turaqty monıtorıng júrgiziledi», - dep jazady Altaı Kólginov.

Onyń aıtýnysha, 2022 jylǵy 1 qańtar men 2023 jylǵy 31 naýryz aralyǵynda pornografııalyq materıaldardy, esirtki quraldaryn taratýǵa, sýıtsıdti nasıhattaýǵa baılanysty 10 myńnan astam buzýshylyq anyqtalǵan.