Internette UBT pýnktterinen tikeleı kórsetilim júrgizildi - BǴM

NUR-SULTAN. QazAqparat - Qazaqstanda Ulttyq biryńǵaı testileý tapsyryp jatqan túlekterdiń alǵashqy legi kóbinde tehnıkalyq mamandyqty tańdaǵan. Bul týraly búgin Ortalyq kommýnıkatsııalar qyzmetinde ótken baspasóz máslıhatynda belgili boldy, dep habarlaıdy QazAqparat tilshisi.

QR Bilim jáne ǵylym mınıstrligi joǵary oqý ornynan keıingi bilim berý departamentiniń dırektory Ádilet Toıbaevtyń aıtýynsha, UBT engizilgen 16 jyldyń ishinde 1,7 mln túlek synaq tapsyrǵan.

«Jalpy UBT-nyń birinshi legi shatattyq jaǵdaıda, qalypty ótti deýge bolady. Ázirge eń joǵary kórsetkish - 137 ball. Erekshe bilim berý qajettigi bar 5 oqýshy da baǵyn synady. Olarǵa barlyq tıisti jaǵdaı jasaldy. UBT-nyń tártipke saı ótýin 500-ge jýyq baıqaýshy qadaǵalady. Sol sııaqty barlyq test tapsyratyn 339 aýdıtorııada beınebaqylaý ornatylǵan. Keshe testileý ótken pýnktterdiń barlyǵynan mınıstrliktiń resmı saıty men YouTube kanalynda tikeleı kórsetilim júrdi. Testileý ótken oryndardyń barlyǵynda uıaly baılanys buǵattaldy», - deıdi Ádilet Toıbaev.

Mınıstrlik taratqan qosymsha aqparatqa súıensek, túlekter arasynda ázirshe tehnıkalyq mamandyqtardy qamtıtyn oqý baǵdarlamalaryna suranys joǵary.

«Matematıka -fızıka baǵdarlamalyq kombınatsııasyn 3963 bala, hımııa-bıologııa kombınatsııasyn 2683 oqýshy tańdaǵan. Birinshi lektiń túlekteri arasynda hımııa-fızıka kombınatsııasyna eń az suranys tirkeldi», - delingen resmı málimette.

Aıte ketsek, QR bilim jáne ǵylym mınıstrligi bıyl UBT synaqtarynyń alǵashqy leginen qansha túlek súrinbeı ótkenin jarııalady.

Qazaqstanda Ulttyq biryńǵaı testileýdi tapsyrý 20 maýsymda bastaldy.