Internette týberkýlezdiń jasandy shtamy týraly aqparat tarady

ASTANA. QazAqparat – Internette Ulybrıtanııada týberkýlezdiń jańa, qoldan jasalǵan jáne elge syrttan ákelingen shtamy taralyp jatqany týraly aqparat paıda boldy. Ony juqtyrǵan árbir úshinshi adam qaıtys bolady-mys. Munyń ras-ótirigin Stopfake.kz anyqtady, dep habarlaıdy QazAqparat.

Ulybrıtanııada týberkýlezdiń jańa, sıntetıkalyq shtamy órship turǵanyna «dálel» retinde paıdalanýshylar Daily Mirror gazetiniń 2023 jylǵy 5 maýsymdaǵy birinshi betiniń sýretin keltirip otyr. Maqala taqyrybynda brıtanılyq professor vaktsına jasaý úshin jedel áreket etýge shaqyrady. Ózge jaǵdaıda týberkýlez juqtyrý sany COVID-19 kórsetkishterinen asyp túspek. Gazettiń bul muqabasy rasymen de bar jáne ony ınternetten tabýǵa bolady.

«Maqalany tolyq Daily Mirror saıtynan oqýǵa bolady. Ol 2023 jyldyń 4 maýsymynda, ıaǵnı basylymnyń baspa nusqasy shyqqannan bir kún buryn jarııalanǵan.

Maqalada Eýropanyń basqa elderimen salystyrǵanda Ulybrıtanııada adamdar týberkýlezben jıi aýyratyny týraly jazylǵan. Jyl saıyn elde 100 000 turǵynǵa shaqqanda 7,8 aýrý juqtyrý jaǵdaıy tirkeledi. Bul rette naýqastardyń úshten biri týberkýlezdiń keıbir túrleri dári-dármekke tózimdi bola túskendikten kóz jumyp otyr.

Týberkýlezden qorǵaıtyn BTsJ vaktsınasyn egý Ulybrıtanııada 2005 jyldan beri mindetti emes. Sondaı-aq maqalada BTsJ aýrý juqtyrýdan tolyq qorǵaı almaıtyndyǵy atap ótilgen.

Sábı kezinde vaktsına alǵan balalarda ımmýnıtet tek jasóspirim kezge deıin saqtalady, sodan keıin vaktsınany qaıta alý kerek.

Maqala keıipkeri, Keıptaýnda týberkýlezdi zertteýmen aınalysatyn professor Robert Ýılkınson álemdi, sonyń ishinde Ulybrıtanııany aýrýdan qorǵaýdyń jalǵyz joly – ómir boıy ımmýnıtetti qamtamasyz etetin vaktsına ázirleý jáne ony mindetti etý dep sanaıdy.

Alaıda, maqalada Ulybrıtanııada qoldan jasalǵan jáne elge ádeıi syrttan ákelingen týberkýlezdiń jańa shtamy anyqtalǵany týraly jazylmaǵan.

Demek, taralǵan aqparat – feık», - dep qorytyndylaıdy stopfake.kz.