Internette otyrǵan balańdy baqyla - Qazaqstandyq oqýshylardyń ınnovatsııalyq jobasy

QARAǴANDY. QazAqparat - Qaraǵandy oblysy Saran qalasynyń №17 mektep oqýshylary balalardyń Internet jelisindegi zııandy kontentke kirýine tyıym salatyn «Ata-ana baqylaýy» baǵdarlamasyn jasap shyǵardy, dep habarlaıdy «QazAqparat» HAA tilshisi.

S# (S Sharp) baǵdarlama jasaý tili negizinde jasalǵan baǵdarlama kámeletke tolmaǵan jastardyń zııan tıgizetin saıttarǵa kirýine tyıym salady. Ata-analardyń tyıym salynǵan tizimine engizilgen saıttarǵa kirgen jaǵdaıda 2-5 mınýttyń ishinde kórsetilgen elektrondyq poshtaǵa habarlandyrý keledi.

«Bul joba qazir ózekti bolyp otyr. Elbasy «Qazaqstan kıberqalqanyn» jasaý týraly tapsyrma bergen bolatyn. Bizdiń qalamyzda alǵashqy qadamdy oqýshylardyń ózderi jasap, balalardy zııandy aqparattan qorǵaý úshin baǵdarlama oılap tapty», - dedi Saran qalalyq bilim bóliminiń baspasóz qyzmeti.


Saranda bul baǵyttaǵy jumys bıylǵy oqý jylynda bastaldy. Saran qalasy ákiminiń orynbasary Eraly Ospanovtyń bastamasymen ótken jyldyń qazanynda №6 mekteptiń bazasynda zamanaýı tehnologııamen jabdyqtalǵan IT-synyp ashyldy.

«Synypty ashýdaǵy maqsat - daryndy oqýshylardy jumyldyryp, kompıýterlik tehnologııalar salasyndaǵy óz ıdeıalaryn júzege asyrýǵa kómektesý. Oqýshylar avtorlyq mýltıplıkatsııalyq fılmder jasap shyǵaryp, olardy saıttarda jarııalaýda. Robot tehnıkasy konkýrsyna daıyndalyp jatyr», - dep atap ótti bilim bólimi.