Internette dinı materıaldar taratqan SQO turǵyny jaýapkershilikke tartyldy

PETROPAVL. QazAqparat – Petropavl qalasynyń ákimshilik quqyq buzýshylyqtar jónindegi mamandandyrylǵan soty din týraly zańdy buzǵan óńir turǵynynyń isin qarady, dep habarlaıdy QazAqparat tilshisi.

Soltústik Qazaqstan oblystyq sotynyń málimetinshe, isti talqylaý barysynda Petropavl turǵynynyń áleýmettik jelini paıdalana otyryp, óz paraqshasynda dybys-beınefaıldardy, aqparattyq siltemeler túrinde dinı mazmundaǵy materıaldardy mezgil-mezgil ornalastyryp turǵany anyqtaldy. Arnaıy saraptama da er adamnyń dinı mazmundaǵy aqparatty taratqanyn rastady.

Sottalýshy óziniń teologııalyq bilimi joq ekendigin, dinı uıymdarda qyzmet etpegenin, faıldardaǵy tildi bilmeıtinin, osyǵan baılanysty ornalastyrylǵan materıaldyń ne maǵyna beretinin aıta almaıtynyn túsindirdi.

«Qazaqstan Respýblıkasynda, barlyq damyǵan elderdegideı, dinı ádebıetti, dinı mazmundaǵy ózge de aqparattyq materıaldardy tek ǵıbadat úılerinde, dinı bilim berý uıymdarynda, sondaı-aq jergilikti atqarýshy organdar arnaıy aıqyndaǵan ǵımarattarda ǵana taratýǵa bolady. Al áleýmettik jeli hat almasýǵa, kelissózder júrgizýge, habarlamalar, faıldar jiberýge, fotosýretter men sýretterdi ornalastyrýǵa arnalǵan. Paraqshaǵa jazylǵandar ornalastyrylǵan materıaldardy erkin kóre alady. Osylaısha, azamat áleýmettik jeliniń múmkindigin paıdalanyp, Qazaqstan Respýblıkasynyń dinı qyzmet jáne dinı birlestikter týraly zańnamasyn buzdy», - delingen habarlamada.

Sot isti qaraı kele, er adamnyń buryn osy bap boıynsha ákimshilik jaýapkershilikke tartylmaǵanyn eskere otyra oǵan aıyppul salý túrindegi jazany kesti.

Aıta keteıik, SQO aýmaǵynda dinı ádebıetti ǵıbadat úılerinen bólek, 15 saýda ornynda satýǵa ruqsat berilgen.