Internetsiz otyrǵan Almaty oblysynyń turǵyndary munara qurastyrdy

TALDYQORǴAN. QazAqparat - Almaty oblysynda ınternetsiz otyrǵan Beriktas aýylynyń turǵyndary uıaly baılanys taratýshy qurylǵy ornatatyn munarany ózderi qurastyrdy. Endi bıiktigi 21 metr qondyrǵyny kóterý úshin arnaıy tehnıka qajet, dep habarlaıdy QazAqparat tilshisi.

70-ke jýyq otbasy bar Beriktas aýylynda 84 oqýshy oqıdy. Karantın kezinde aýyldyń 20-ǵa jýyq stýdenti keldi. Ǵalamtordyń joqtyǵy balalardyń onlaın bilim alýyn qıyndatty. Osyǵan alańdaǵan ata-analar uıaly baılanys operatorlaryna ózderi shyqqan. Ol jerde shaǵyn aýylǵa ǵalamtor tartý tıimsiz ekenin alǵa tartyp, ózderine munara jasatýdy usynǵan. Aýyldaǵy aǵaıyn birigip, bir aı kóleminde temir jınap, 21 metrlik munara qurastyrdy. Áýel basta turǵyndar munarany qalaǵa tapsyrys berip jasatpaq bolǵan. Alaıda kásiporynda bul jumysty 3 mln teńgeden astam qarjyǵa baǵalaǵan.

«Bir aı boldy ǵoı osy «vyshkamen» aınalysqaly beri. Endi jasaýyn jasadyq. Osyny turǵyzatyn kran kerek bolyp tur. Sol kranǵa qınalyp jatyrmyz. Áıtpese bári daıyn bolyp tur. 100 myńnan astam aqsha suraıdy. Oǵan taǵy da jınaımyz ba, bilmeı otyrmyz?», - deıdi aýyl turǵyny Erik Núsipov.

Al aýyl ákimi Álııa Baqtııarova baılanys operatory kelip ınternet jelisin qosyp beretinin málimdedi. Sondaı-aq, «munara ornalasqan jer telimin, memlekettik aktilerin jáne de basqa qujattaryn ózim rettep beremin» dep senim bildirdi.