Internet saýda: Qazaqstandyq tutynýshylardyń quqyǵy qalaı qorǵalmaq

NUR-SULTAN. QazAqparat – Búginde elimizde ınternet arqyly saýda jasaý jaqsy jolǵa qoıylǵan. ıAǵnı úıde otyryp kez kelgen taýarǵa tapsyrys berip, satyp alý múmkindigi bar. Osy oraıda tutynýshylardyń quqyǵy qalaı qorǵalyp jatyr. Bul týraly QR Saýda jáne ıntegratsııa mınıstrligi tutynýshylardyń quqyǵyn qorǵaý komıteti tóraǵasynyń orynbasary Serik Qusaıynov aıtyp berdi, dep habarlaıdy QazAqparat tilshisi.

«Taýardy ınterner arqyly satyp alý qashyqtan jasalatyn saýda túrine jatady. Qashyqtan jasalatyn saýda barysy zańmen qadaǵalanady. Sonymen qatar saýda mınıstrliginde ishki saýda erejesi degen normatıvtik akt bar. Onda elektrondy saýdany retteýge qatysty barlyq jaıttar anyq jazylǵan. Endigi ýaqytta sol normatıvtik akt erejesin «Tutynýshylardyń quqyǵyn qorǵaý» týraly salalyq zańǵa engizýdi josparlap otyrmyz. Sebebi saýda mınıstrliginde ınternet saýdaǵa qatysty osyndaı buıryqtyń baryn ekiniń biri bile bermeıdi», - dedi Serik Qusaıynov BAQ ókilderimen kezdesý barysynda.

Onyń aıtýynsha, ınternet arqyly saýda jasaýdaǵy bar kedergilerdi joıý kerek.

«Internet arqyly saýda jasaıtyn tutynýshylardyń quqyǵyn qorǵaý úshin biz zańǵa tıisti ózgeris engizýdi qalaımyz. Buryn ınternet saýdasy asa damyǵan emes. Pandemııa bastalǵan soń barlyǵy onlaınǵa kóshe bastady», - deıdi ol.