Internet sarsańyna túsken túrkistandyq muǵalimderdiń problemasy sheshiletin boldy

Túrkistan oblysynyń Qazyǵurt aýdanyna qarasty Aqqum aýylynda ınternet sapasy jaqsaratyn boldy, dep habarlaıdy QazAqparat tilshisi.

Tsıfrlyq damý, ınnovatsııalar jáne aeroǵarysh ónerkásibi mınıstrliginiń málimetinshe, vedomstvo Transtelekom operatorymen birge atalǵan aýyldaǵy baılanys jáne ınternet sapasyn jaqsartýdy qolǵa alady.

«Transtelekom» AQ Túrkistan oblysynyń Aqqum aýylynda sekýndyna 20 Mbıt-ke deıin ınternetpen jáne radıorelelik kópir tehnologııasy boıynsha lımıtsiz trafıkpen qamtamasyz etý jumystaryn júrgizedi», - dep atap ótti Tsıfrlyq damý mınıstrliginen.

Aıta keterligi, Tsıfrlyq damý mınıstrligi baılanys salasynda «Qoljetimdi ınternet» ulttyq jobasyn ázirledi. Atalǵan joba aıasynda Aqqum aýylyn qosa alǵanda 3 myńnan astam eldi mekendi talshyqty-optıkalyq baılanys jelisi qyzmetimen qamtamasyz etý jónindegi is-shara qarastyrylǵan.

Buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligi Túrkistan oblysynda muǵalimderdiń elektrondy kúndelik toltyrý úshin dala kezip júrgen sýretine pikir bildirgen edi.

Sodan keıin Kcell kompanııasy da atalǵan aýylda ınternettiń sapasyz bolý sebebin ataǵan bolatyn.