Internet sapasy úshin operatorlarǵa salynatyn aıyppul 10 esege artty – Mýsın

ASTANA. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın baılanys sapasyn tekserý maqsatynda turǵyndar kóp shaǵym jasaıtyn aýdandardy aralady, dep habarlaıdy QazAqparat tilshisi.

Kezdesýge uıaly baılanys operatorlary da keldi, olar bar másele – turǵyndardyń radıofobııasynda dep túsindirdi. Elordanyń keı turǵyndary úı tóbesine bazalyq stantsııalardy ornatýǵa ruqsat bermeıdi. Sonyń saldarynan aýmaqta baılanys nasharlaıdy jáne ınternet nashar bolady.

Alaıda mınıstr muny uıaly baılanys operatorlarynyń jumysy ekenin, halyqpen, ákimdikpen jumys istep, jer telimin suraý kerektigin aıtty.

«Sizderde eki tańdaý bar. Ne munda qalypty 4G bolady, ne árbir operatorǵa 4 mln teńge aıyppul salynady. Ár eki aı saıyn aıyppul jazýdan sharshamaımyz», - dedi B. Mýsın.

Onyń aıtýynsha, jyl basynan beri baılanys operatorlaryna 150 mln teńge aıyppul salynǵan. Alaıda, shilde aıynda Prezıdent baılanys operatorlaryna aıyppuldardy 10 ese arttyrýdy kózdeıtin zańǵa qol qoıdy.

«Buryn 300-350 myń teńge aıyppul salatyn edik. Al jańa ózgeristerden keıin aıyppul somasy shamamen 4 mln teńge bolady. ıAǵnı, biz naqty tekserý úshin aıyppuldy 10 esege arttyrdyq. Ózimizden de jaýapkershilikti ysyryp tastaı almaımyz. Zańnamalyq turǵydaǵy kedergilerdi ózgertýge tyrysamyz. ıAǵnı, bárimiz óz ókilettikterimiz aıasynda múmkindiginshe áreket etýimiz kerek. Eger baılanys operatorlary sapa standarttaryna sáıkes kelip, klıentterge qalypty jaǵdaı jasaǵysy kelse, baılanys sapasyn jaqsartý úshin jumys isteýi kerek», - dep tolyqtyrdy Baǵdat Mýsın.

Tsıfrlyq damý mınıstri elordada halyq sany kóbeıip, qurylys jumystary belsendi júrgendikten, ınternet máselesi de ózge aımaqtardan ózektirek bola túskenin aıtty. Sondaı-aq baılanys operatory qalasa, kóp máseleni sheshýge bolatynyn atap ótti.

«Birneshe shaǵynaýdannyń turǵyndary radıofobııaǵa baılanysty bazalyq stantsııa ornatýǵa ruqsat bermeıdi. Uıaly baılanys operatorlary 40 jańa bazalyq stantsııa ornatsa, onyń 38-i keri alynyp jatyr. Sóıte tura, turǵyndar sapaly ınternet paıdalanǵysy keledi. Bazalyq stantsııany aýlada ornatýǵa bolady. Operator shyn qalasa, bul máseleni sheshýge bolady. Ákimdikpen kelisip, qosymsha jer telimin surasyn. Al biz normatıvtik-quqyqtyq aktilerdi qabyldaımyz, lıtsenzııalar men radıojıilikterdi taratamyz. Aýdan nemese turǵyn úı keshenderi turǵyndarynyń 50% kelisimimen, basym daýyspen bazalyq stantsııa ornatý jóninde zańǵa ózgeris engizýdi usynamyz», - dedi Baǵdat Mýsın.