Internet-kazıno qyzmetine tyıym salynady

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Zań jobasy elimizdegi oıyn bıznesi salasyndaǵy zań normalaryn jetildirýdi kózdeıdi. Munda oıyn bıznesi týraly zańnamany aınalyp ótýge múmkindik beretin alshaqtyqtar men qaıshylyqtardy joıý sharalaryn qarastyrady. Sonymen qatar, ınternet-kazıno qyzmetine, onyń ishinde Qazaqstan aýmaǵyndaǵy sheteldik ınternet-kazıno qyzmetine tyıym salý belgilenedi. Budan bólek, oıyn bıznesi salasynda lıtsenzııa alý kezinde ótinish berýshilerdiń talaptaryn qatańdatý qarastyrylady.

Sonymen qatar, oıyn bıznesi salasyna salynatyn salyq mólsheri arta túsedi. Mádenıet jáne sport vıtse-mınıstri Tastanbek Esentaevtyń aıtýynsha, zań jobasy boıynsha býkmeker keńsesi jáne totalızator kassalarynan alynatyn salyq 75 aılyq eseptik kórsetkishten (138 900 teńge) 150 aılyq eseptik kórsetkishke deıin (277 800 teńge) ulǵaıatyn bolady. Al býkmeker keńsesi men totalızatordyń elektrondyq kassasyna salynatyn salyq 2000 aılyq eseptik kórsetkishke deıin (3 mln. 704 myń teńge) artady.

Bul rette elektrondyq kassaǵa salyqty arttyrý negizinen ony paıdalanýshylardyń kóptigine qaraı oryn alyp otyr. Máselen, orta eseppen alǵanda Internet-resýrs arqyly bás tigýge tirkelgen qatysýshylardyń sany 200 myń adamǵa jetedi ári olardyń 50 paıyzy turaqty qatysýshylar bolyp tabylady.

«Oıyn mekemelerin, býkmeker keńsesi kassalaryn jáne totalızatorlardy turǵyn úı ǵımarattarǵa ornalastyrýǵa tyıym salynady», -dedi vıtse-mınıstr.