Internet arqyly traktor satyp almaq bolǵan petropavldyq 750 myń teńgesinen aıyryldy
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń egde jastaǵy turǵyny ınternet-alaıaqtyq týraly aryzben polıtsııaǵa júgindi. Aıtýynsha, zeınetke shyǵar aldynda shaǵyn traktor satyp almaqshy bolǵan. OLh-te baǵasy arzandaý traktordy taýyp, «satýshymen» WhatsApp messendjeri arqyly sóılesken. Alaıaq traktordy basqa qaladan alyp kelý qajettigin syltaýratyp, er adamnan aldyn ala tólemge jáne jol shyǵyndaryna 750 myń teńge surap alǵan. Keıin «satýshy» baılanysqa shyqpaı qoıady.
Atalǵan fakti Sotqa deıingi tergep-tekserýdiń biryńǵaı tizilimine «Alaıaqtyq» baby boıynsha engizildi. Polıtseıler jedel-izdestirý is-sharalaryn júrgizip jatyr.
«Kıberqylmyskerler kez kelgen veb-resýrsta jumys isteıdi, alaıda, olar OLx saıtynda jıi kezdesedi. Bul saıtta ınternet-alaıaqtyqtyń úshten bir bóligi jasalady. Jyl basynan oblysta tirkelgen 335 faktiniń 103-i osy saıtqa tıesili. Qaskóıler jalǵan taýarlar men qyzmetter úshin aldyn ala tólem talap etedi. Satýshylarǵa «jetkizý» qyzmetin (OLx saıtynda bundaı qyzmet joq) usynady jáne ol úshin silteme arqyly ótip, bank kartalarynyń derekterine ngizý qajettigi týraly aıtady. Silteme jalǵan paraqshaǵa ákeledi, bul paraqshaǵa engizilgen derekter qylmyskerdiń qolyna túsip, esepshottarǵa qol jetkizýge múmkindik beredi», - deıdi SQO polıtsııa departamenti krımınaldyq polıtsııa basqarmasynyń asa mańyzdy ister jónindegi aǵa jedel ýákili Vıtalıı Podchernın.
Polıtseılerdiń aıtýynsha, jaz kezinde ınternet-alaıaqtar páterdi jalǵa berý, jıhazdy satý týraly jıi «usynys» jasaıdy. Alaıaqtardyń quryǵyna kóp jaǵdaıda áıelder túsedi, osyndaı213 jaǵdaı tirkelgen.
Tártip saqshylary soltústikqazaqstandyqtardy asa saq bolýǵa, jeke málimetterdi eshkimge bermeýge şaqyrady. Internette taýar satyp alǵan jaǵdaıda beıne qońyraýdy talap etken jón: óz betterin jasyrý jáne taýardyń joq ekendigin kórsetpeý úshin qylmyskerler bul usynystan bas tartady.