Internet arqyly saýda jasamaq bolǵan SQO turǵyny 550 myń teńgesinen aıyryldy
SQO Polıtsııa departamenti baspasóz qyzmetiniń málimetinshe, Petropavl turǵyny jazda ınternet jelisinde «Mercedes» mınıveniniń satylatyndyǵy jóninde habarlandyrýdy kóredi. «Satýshy» onyń senimine kirý úshin balasynyń emine shuǵyl aqsha qajet ekendigin aıtyp, jeke qujattarynyń sýretterin kórsetken. Keıin ol qujattardyń ınternetten alynǵan bóten adamnyń sýretteri ekeni anyqtalǵan.
Petropavl turǵyny «satýshyǵa» 550 myń teńge kóleminde aldyn ala aqsha aýdarǵan. Sodan keıin habarlandyrý ıesi baılanysqa shyqpaı qoıǵan. Jábirlenýshi polıtsııaǵa aryzymen júgindi.
Atalǵan fakti «Alaıaqtyq» baby boıynsha sotqa deıingi tergep-tekserýlerdiń biryńǵaı tizilimine engizildi. Jedel is-sharalardyń nátıjesinde polıtseıler kúdiktini – Almaty qalasynyń 39 jastaǵy turǵynyn anyqtady. Kúdikti sotqa deıingi tergeý kezinde jábirlenýshimen tatýlasyp, isti toqtatqysy kelgen. Alaıda tergeý materıaldary sotqa joldanatyn bolady.
«Aldyn ala tólem talap etý jaǵdaılaryna kúdikpen qaraý kerek. Mundaı tásil – ınternet-alaıaqtyqtyń keń taraǵan túri. Internet arqyly saýda jasaýǵa saqtyqpen qaraýdy suraımyz. Aldyn ala tólem jasaý talaptaryna kónbeńizder, taýarǵa vıdeosholý jasaýdy surańyzdar», - deıdi SQO PD Krımınaldyq polıtsııa basqarmasynyń asa mańyzdy ister jónindegi aǵa jedel ýákili Vıtalıı Podchernın.