Internet arqyly páter jaldamaq bolǵan qostanaılyq aldanyp qaldy
«Anti-Fraud» profılaktıkalyq sharasy kezinde oblystaǵy kıberqylmyskerler qolǵa tústi. Olar ǵalamtor arqyly turǵyndardy san soqtyryp kelgen. Máselen, Qostanaı qalasynyń turǵyny eki ınternet alaıaǵynyń qurbany bolǵanyn aıtyp, polıtseılerge shaǵymdanǵan.
«Japa shekken áıeldiń aıtýynsha, ol «OLX» saıty arqyly jalǵa páter alǵysy kelgen. Áldebir habarlandyrý páter baǵasynyń arzandyǵymen ári qolaıly jaǵdaılarymen munyń nazaryn birden aýdartqan. Satýshy telefon arqyly baılanysqan jábirlenýshige páteraqyny erterek tóleý kerektigin aıtady. Sózine sengen turǵyn satýshy keńes bergen bógde er kisige baryp, qolyna 56 500 teńge sanap bergen. Budan soń jalǵa berýshi tulǵa bul áıelmen aradaǵy baılanysty úzip, telefonyn óshirip tastaıdy», - delingen PD baspasóz habarlamasynda.
Osy fakti boıynsha alaıaqtyq jasady degen kúdikpen eki azamat ustaldy. Olardyń sol ýaqytta Qostanaıdyń basqa bir turǵynynan 57 myń teńge alǵany anyqtaldy.
Qazirgi ýaqytta atalǵan derek boıynsha sotqa deıingi tergeý júrgizilip jatyr.
Qostanaılyq tártip saqshylary taǵy da azamattarǵa ınternet arqyly saýda jasar kezde barynsha saq bolýdy eskertedi.
«Barlyq kelisimshart eki taraptyń kózbe-kóz kezdesýi arqyly ǵana iske asýy qaperden shyqpaýy kerek. Sondaı-aq, óz múlkińizdi qaýipsizdendirý úshin kartalyq shottaryńyzdyń derbes anyqtamalaryn jáne pın-kodtardy beıtanys adamdarǵa eshqandaı jaǵdaıda aıtýǵa bolmaıdy. Eger qalaı bolǵanda da alaıaqtardyń qurbanyna aınalsańyz, birden polıtsııaǵa júginýińiz shart», - dep habarlaıdy PD-niń baspasóz qyzmeti.
Osyǵan deıin Qostanaı oblysynda «Elektrondy malshy» jobasy engizililgendigin habarlaǵanbyz.