Internet arqyly esirtki satatyndardy jazalaý qadamy aıqyndaldy

NUR-SULTAN. QazAqparat – Internet artqyly esirtki satatyndarǵa jaza kúsheıtiledi. Bul týraly Parlament Májilisiniń jalpy otyrysy qylmystyq-protsestik zańnamany jetildirý máselelerin talqylaý barysynda QR Bas prokýrorynyń orynbasary Marat Ahmetjanov málim etti, dep habarlaıdy QazAqparat tilshisi.

«Zańsyz esirtki aınalymy úshin elektrondy aqparat resýrstardy paıdalaný degen saralaý belgisi engizilmek. Bundaı qylmystar úshin 15 jylǵa deıin bas bostandyǵynan aıyrý kózdelip otyr. Qazir jastar kóbine ınternette, áleýmettik jelilerde otyrady. Al esirtki satýshylar bolsa, tehnologııalardy paıdalaný arqyly ózderiniń teris pıǵyldaryn iske asyrýda. Olardy keńinen qoldaný arqyly esirtkini taratýdyń jańa jolyn taýyp alǵan. Bul jaǵdaı zańnamalyq ózgeristerdi talap etedi», - dedi Marat Ahmetjanov.

Aıta keteıik, búgin jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine qylmystyq jáne qylmystyq-protsestik zańnamany jetildirý máseleleri boıynsha ózgerister men tolyqtyrýlar engizý týraly» zań jobasy talqylap, birinshi oqylymda maquldady.

Osy oraıda, urlyqqa qatysty áreketter aýyr qylmystar sanatyna kóshetini málim boldy.

Sonymen qatar, ınspektordy jáne qoryqshynyń ómirine qaýip tóndirip, kúsh qoldanǵany úshin jaýapkershilik engizý qarastyrylǵan. Osyndaı qylmystar úshin jıyrma jylǵa deıin bas bostandyǵynan aıyrý bolady.