Internet-alaıaqtardyń qurbany bolmaý úshin ne isteý kerek

ASTANA. QazAqparat – Jyl basynan beri 500-den asa adam ártúrli ınvestıtsııalarǵa tartý arqyly jasalǵan alaıaqtyq qurbany boldy. Bul týraly ІІM Krımınaldyq polıtsııa departamenti Kıberqylmysqa qarsy kúres ortalyǵynyń bastyǵy Jandos Súıinbaı aıtty, dep habarlaıdy QazAqparat tilshisi.

«Internet-alaıaqtardyń qurbany bolmaý úshin qaýipsizdik is-sharalaryn ustaný qajet. Birinshiden, tekserilgen jarnama saıttaryn paıdalanyńyz. Ekinshiden, taýardy alǵannan keıin tólem týraly kelisińiz. Úshinshiden, taýardyń bar ekenine kóz jetkizińiz, onyń ishinde beıne qońyraý arqyly da. Eger satýshy basqa qalada bolsa, onda tanystaryńyzdan nemese týystaryńyzdan taýardy alýdy jáne jiberýdi ótinińiz», - dedi ortalyq bastyǵy mınıstrliktiń baspasóz qyzmeti alańynda ótken brıfıngte.

Sonymen qatar ol sońǵy birneshe aıda ártúrli ınvestıtsııalar men ınvestıtsııalardy tartý arqyly jasalǵan alaıaqtyqtardyń sany artqanyn aıtady.

«Jyl basynan beri 500-den asa adam mundaı shemalardyń qurbany boldy. Olar aqshalaryn jumys istemeıtin ınvestıtsııalyq jobalarǵa saldy. Sonymen qatar, keıbir jaǵdaıda osy maqsat úshin nesıeler rásimdedi. Jeńil aqshany izdep jınaqtaryn joǵaltty. Alaıaqtar iri kompanııalardyń, onyń ishinde ulttyq kompanııalardyń, bankterdiń, krıptobırjalardyń atynan jalǵan saıttar qurý arqyly azamattardy qyzyqtyrady. Bul rette «menedjerlermen» jáne «brokerlermen» barlyq qarym-qatynas onlaın-rejımde, onyń ishinde messendjerler arqyly ótedi. Keıbir jaǵdaılarda alaıaqtar úlken somany tartý úshin bir rettik dıvıdendter tóleıdi», - dedi Jandos Súıinbaı.