Internet alaıaqtardyń kóbi aqshany Reseıde tirkelgen bank shottaryna aýdarady – polıtsııa

NUR-SULTAN. QazAqparat – Internet alaıaqtar urlanǵan aqshany sheteldik bankterdiń shottaryna aýdarady. Nur-Sultan qalasynyń polıtsııa departamentinde ótken brıfıngide Tergeý basqarmasynyń aǵa tergeýshisi Rıshad Áıtkenov osylaı málimdedi, dep habarlaıdy QazAqparat tilshisi.

«Internet alaıaqtyq isterin tergeý nátıjesinde urlanǵan aqsha kóbine sheteldik bank shottaryna jiberiletinin anyqtadyq. Basym kópshiligi qarajatty Reseı Federatsııasynyń aýmaǵynda tirkelgen bank shottaryna aýdarady. Aqshany qaıtarý úshin biz zańnamada belgilengen tártipter boıynsha is-sharalar júrgizip jatyrmyz. Qarajat shet memlekettegi bank shotyna aýdarylǵan jaǵdaıda akkaýnttardy anyqtaý úshin ol elge hat joldanady», - dep atap ótti Rıshad Áıtkenov.

Onyń dereginshe, jyl basynan beri elordada ınternet alaıaqtyq jasaǵany úshin 276 adam qylmystyq jaýapqa tartylǵan. Degenmen tirkelgen qylmystyq isterdiń jartysynan astamy ashylmaǵan.