Integratsııalyq úderister jaǵdaıynda Qazaqstannyń sot júıesi ózgerister údesinen shyǵýǵa daıyn bolýy kerek - K. Másimov
Búgin Astanada «Ádiletti sot júıesi jáne turaqty zańnama - tartymdy ınvestıtsııalyq klımattyń negizi» atty taqyryppen ótip jatqan «dóńgelek ústel» jıynyna qatysýshylarǵa joldaǵan quttyqtaý hatynda QR Premer-Mınıstri Kárim Másimov osylaı dedi. Eske salaıyq, jıyn barysynda Úkimet basshysynyń joldaýhatyn vıtse-premer Berdibek Saparbaev oqyp bergen bolatyn.
Premer-mınıstr óz hatynda búgingi tańda memleket tarapynan bıliktiń jeke tarmaǵy retindegi sot júıesin qalyptastyrýǵa baǵyttalǵan sharalar kesheni júzege asyrylǵanyna toqtala kele, osy arqyly zańdy jáne jeke tulǵalardyń múddeleri men konstıtýtsııalyq quqyqtary qorǵalatynyn alǵa tartady. «Sonymen bir mezgilde, oryn alyp otyrǵan ekonomıkalyq ahýaldy jáne eýrazııalyq keńistiktegi ıntegratsııalyq úderisterdi eskere otyryp, sot júıesi búgingi kúni ózgeristerge ushyrap jatqan talaptarǵa jaýap berýge ázir bolýy tıis», - delingen quttyqtaý hatynda.
Budan bólek, Úkimet basshysy aǵymdaǵy jyldyń 1 qańtarynan Qylmystyq, Qylmystyq is-júrgizý, Qylmystyq atqarý jáne Ákimshilik quqyq buzýshylyqtar kodeksteri kúshine engenine toqtala kele, ondaı qujattardyń sot jáne tutastaı quqyq qorǵaý júıeleriniń deńgeıin jańa sapaly deńgeıge shyǵaratynyn alǵa tartady. Premer-Mınıstrdiń pikirinshe, bul baǵyttaǵy kezekti qadam azamattyq sot óndirisin jańǵyrtý men ınvestorlar úshin jaǵymdy ahýal qalyptastyrýǵa baǵyttalǵan jańa redaktsııadaǵy Azamattyq is-júrgizý kodeksi bolyp tabylady.
«Investorlar úshin qabyldanyp jatqan sharalar jıyntyǵy, sonymen qatar, zańnama deńgeıinde qarastyrylǵan kepilder men jeńildikter elimizdegi ınvestıtsııalyq ahýaldyń odan ári jaqsarýyna óz septigin tıgizedi», - deıdi Kárim Másimov óz hatynda.
Sonymen qatar, Premer-Mınıstr óz tarapynan aldaǵy ýaqytta da tıimdi ádilsot júıesin qamtamasyz etý úshin el Úkimetiniń QR Joǵarǵy Sotymen birlese jumys isteýge daıyn ekendigin málimdeıdi.