Instagram-daǵy jarnamaǵa aldanǵan pavlodarlyq 19 mln teńgesinen aıyryldy
Birneshe kún buryn Pavlodar qalasynyń polıtsııasyna er adam júgingen. Ol belgisiz tulǵalar aqparattyq júıeler arqyly onyń 19 mln 475 myń teńge somasynda aqshasyn ıemdengenin jetkizgen. Ol Instagram-da krıptovalıýtadan aqsha tapqysy keletin adamdar oqýǵa qabyldanatyny týraly habarlandyrý kórgen. Qarjy akademııasy dep atalǵan akkaýnttyń habarlandyrýyna jaýap berip, óziniń baılanys derekterin qaldyrǵan.
«Keıin belgisizder oǵan Telegram arqyly shyqqan. Operator oqýǵa ýaqyt jumsamaı-aq, úlken tabys ákeletin baǵdarlamaǵa qatysýdy usynǵan. Ol úshin «Binance»-te elektrondy ámııan ashyp, sol jerde shotty toltyrý qajet bolatynyn aıtqan. Er adam keńesterge qulaq asyp, 5500 dollardy birden salady, sodan keıin operator qyzdyń keńesterine súıene otyryp, bul aqshany «Metamask» baǵdarlamasyna aýdarǵan. Keıin onyń shotyn kýratorlar ulǵaıtyp 38 939 dollarǵa jetkizgen.
Alaıda operator qyzdyń aıtýynsha, barlyq depozıtti alý úshin er adam «ótimdilikke qosymsha tólem» tastaýy kerek bolǵan, onyń quny da 5500 dollardy quraǵan. Paıdalanýshy bul talapty moıynsunýshylyqpen oryndady. Operator bul áreketti shot ashylǵanǵa deıin jáne kóbeıgen qarajatty sheship alýǵa qol jetimdi bolǵansha qaıtalaý qajet dep sendirgen. Pavlodarlyq bul operatsııany 6 ret birdeı somaǵa jasaıdy. Osydan keıin ǵana kýrator aqsha jetkilikti ekenin jáne jaqyn arada oǵan 78 000 dollar aýdarylatynyn aıtqan. Biraq, onyń kútkenimen er adamǵa armandaǵan aqsha túspedi.
Biraz ýaqyttan keıin oǵan basqa eldiń belgisiz nómirinen qaıta qońyraý shalyp, taǵy 2500 dollar salyq tóleý kerektigi aıtylǵan. Qalaǵan maqsatqa jetýge tyrysyp, ósken somasyn ala qoımaqshy bolǵan azamat «salyqty» da tólep jiberedi. Alaıda, onyń shotqa salǵan barlyq aqshasy birden joıylady», - delingen polıtsııa málimetinde.
Osydan keıin ǵana Pavlodar turǵyny alaıaqtardyń qurǵan tuzaǵyna ilingenin túsinip, polıtsııaǵa kómek surap barǵan.
«Qazirgi ýaqytta tártip saqshylary qaskóılerdiń jeke basyn jáne ornalasqan jerin anyqtaý sharalaryn qabyldap jatyr. QR Qylmystyq kodeksiniń 190-baby boıynsha tergeý júrgizilip jatyr. Aıta keteıik, bıyl Pavlodar oblysynda 1511 alaıaqtyq faktisi tirkelgen, onyń ishinde aqparattyq tehnologııalardy paıdalanýmen jasalǵany – 1057», - delingen habarlamada.