Instagram-da nege jaýap bermeısiz – Aımaǵambetov túsindirdi

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Instagram-daǵy jeke paraqshasyna kelip túsetin saýaldarǵa nelikten jaýap bermeıtindigin túsindirdi, dep habarlaıdy QazAqparat tilshisi.

«Instagram-da meni oqyp otyratyn 100 myńnan astam halyq bar. Kúnine 400-500-ge deıin suraq kelip túsedi. Facebook paraqshama da biraz suraq túsip jatady. Oǵan qosa blogyma túsetin suraqtar bar. Sondyqtan kúnine myń suraqqa jaýap berý qıyn. Onyń ústine ol suraqtardyń kópshiligi qaıtalanyp otyrady. Kópshiligi mınıstrliktiń saıtynda jaýap berilgen máselelerdi qamtıdy. Taǵy birazy júıeli máseleni emes, adamnyń jeke quqyǵyna baılanysty bolyp keledi. Bilim jáne ǵylym mınıstrligi, jalpy mınıstr naqty osyndaı máselemen jeke ózi aınalysatyn bolsa, onda onyń jumys isteýine qıyndyq týady», - dedi Ashat Aımaǵambetov halyqqa esep berý kezdesý barysynda atyna túsken saýalǵa oraı.

Onyń atap ótýinshe, kelip túsken suraqtar jergilikti atqarýshy organdarǵa jiberilip otyrady. Olardyń tarapynan sheshim tappaǵan jaǵdaıda ǵana másele mınıstrlikte qarastyrylady.