Innovatsııany qoldaý jańa ındýstrııalardy qalyptastyratynyn árbir qazaqstandyq jaqsy bilýge tıis

ASTANA. QazAqparat - Elimiz ótken jeltoqsan aıynda ǵana Táýelsizdiktiń 25 jyldyǵyn zor órleý ústinde saltanatty jaǵdaıda atap ótkeni barshamyzdyń esimizde. Eki jarym ǵasyrdan astam ýaqyt Reseı ımperııasynyń bodanynda, onyń ishinde 74 jyl Keńes Odaǵynyń quramynda bolǵan qazaq eli úshin «táýelsizdik» degen sózdiń qadir-qasıeti erekshe qymbat, aıryqsha mańyzdy.

Reseı ımperııasy bizdiń jerimizdiń baılyǵyn súlikshe soryp, halqymyzdy qanshama qandy qyrǵynǵa ushyratqany halyq sanasynan áli óshken joq. Al, kommýnıstik partııa bılep-tóstegen Keńester Odaǵy da qaramaǵyndaǵy buratana halyqtardy aıaýsyz basyp janshydy. Jerimizdiń asty-ústi toly baılyqty da ortalyq ıemdendi. Biz, qazaqtar, tilimizden de, dinimizden de, barlyq rýhanı qundylyqtarymyzdan da aırylyp qala jazdadyq. 1991 jyly el Táýelsizdigin jarııalaǵan kezde biz keńestik zaýyttardyń qırandylarynyń arasynda qalǵan edik. Bizge keńes úkimetinen birde-bir jibi túzý kásiporyn, ne óndiris orny qalmaǵan-dy. El ekonomıkasy turalap turdy. Kásiporyndar jabylyp, mıllıondaǵan adamdar jumyssyz sandalyp ketti.

Tap osyndaı qoǵam men memleket jáne adam taǵ­dyry synǵa túsken sátte Tuńǵysh Prezıdentimiz, Ult kóshbasshysy Nursultan Ábishuly Nazarbaevtyń dana basshylyǵy arqasynda jas memleketimizdiń irgetasyn qalap qana qoımaı, qabyrǵasyn berik etip turǵyzyp, shańyraǵyn shyrqaý bıik kóterýge jetkizip sol shańyraqtyń ushar basyna móldir aspan tústes kógildir baıraǵymyzdy da jelbiretip úlgerdik. Al, táýelsizdik alǵaly aradan ótken 25 jylda biz Elbasy usynǵan «Qazaqstan - 2030» strategııasynda belgilengen mindetterdi tolyq júzege asyryp, álemdegi eń damyǵan 50 memlekettiń qataryna endik. Elbasy N.Á.Nazarbaev aıtqandaı, ótken 25 jyl ishinde biz álem kartasynda bolmaǵan memleket - táýelsiz Qazaqstan memleketin qurdyq. Memlekettik shekaramyz halyqaralyq deńgeıde bekitildi.

El-memleket basqa­rýdyń Konstıtýtsııalyq negizde jumys isteıtin tıimdi júıesi quryldy. Sondaı-aq, biz zamanaýı Qarýly kúshter men quqyq qorǵaý júıesin ıelenip otyrmyz. Halyqaralyq deńgeıde memle­ketimizdiń abyroı-bedeli kún sanap joǵarylap keledi. Táýelsizdik jyldarynda ekonomıkamyz 20 esege ósti. Biz ekonomıkanyń tıimdi modelin jasadyq. Bizde kommýnıkatsııanyń, óndiristiń, elektr qýatyn taratýdyń biryńǵaı júıesi Táýel­sizdik jyldary qalyptasty.

Búginde bir­yń­ǵaı kólik júıesin qurý isi de aıaqtalýǵa taıaý. Qazirdiń ózinde 1000 shaqyrym avtomobıl joly, 3000 shaqyrymǵa jýyq temirjol tóseldi. Júzdegen óńdeýshi kásiporyndar salyndy. Mádenıet, rýhanııat salasyndaǵy tabystarymyz qanshama. Shırek ǵasyrda jańa Elordamyz - Astanamyzdy salyp aldyq. Ol qazaq eliniń abyroıyna, sımvolyna aınaldy. Osy jyldyń ishinde 1 mıllıonnan astam otbasy jańa qonystarǵa jaıǵasty. 1350 jańa mektep salynyp, 2700-den astam balabaqsha jáne shaǵyn balalar ortalyqtary ashyldy. Barlyq óńirlerde 20 Nazarbaev zııatkerlik mektepteri ashyldy. «Bolashaq» baǵdarlamasy boıynsha 12 myń qazaqstandyq jastar shetelderde oqydy. 1300 aýrýhana men emhanalar salyndy.

El egemendiginiń jıyrma bes jylda osyndaı tabystarǵa qol jetkizgen táýelsiz Qa­zaqstan búginde Úshinshi jańǵyrý kezeńine aıaq basyp otyr. Bul týraly Qazaqstan Respýblıkasynyń Prezıdenti, Ult Kósh­basshysy N.Á.Nazarbaev 2017 jylǵy qań­tar aıynda jarııalaǵan «Qa­zaqstannyń úshinshi jańǵyrýy: ja­handyq básekege qabilettilik» dep atalatyn jańa Jol­daýynda málimdedi. «Búgin men Qazaqstandy Úshinshi jań­ǵyrtý jóninde mindet qoıyp otyrmyn, - dedi Elbasy osy Joldaýynda. - Eldiń jahandyq básekege qabilettiligin qamtamasyz ete­tin ekonomıkalyq ósim­niń jańa mo­delin qurý qajet... Tabysty ótken eki jańǵyrý arqyly baǵa jetpes táji­rıbe jınaqtadyq. Biz endi alǵa batyl qadam basyp, Úshinshi jańǵyrýdy bastaýǵa tıispiz. Bul jańǵyrý - qazirgi syn-qaterlermen kúres jospary emes, bolashaqqa, «Qazaqstan - 2050» strategııasy maqsattaryna bastaıtyn senimdi kópir bolmaq. Ol «Ult jospary - 100 naqty qadam» bazasynda ótkiziledi».

Osylaı degen Prezıdent N.Á. Nazarbaev óz Joldaýynda úshinshi jańǵyrýdyń negizgi basymdyqtaryn kórsetip berdi. Onyń birinshisi - ekonomıkanyń jedel­detilgen tehnologııalyq jańǵyrtylýy.
IT (aqparattyq tehnologııa) salasyn damytý - ýaqyt talaby bolyp tabylatynyn eskertti Elbasy.

Innovatsııany qoldaý jáne olardy ón­diriske batyl engizý jańa ındýstrııalardy qalyptastyrýǵa bastaıtyn jol ekenin búginde árbir qazaqstandyq jaqsy bilýge tıis.