Innovatsııalyq jobalarǵa qoıylatyn talaptar kúsheıtiledi

ALMATY. QAZAQPARAT -Innovatsııalyq grantqa ıe bolǵysy keletin úmitkerlerge qoıylatyn talaptar kúsheıtiledi. Bul týraly QR Tehnologııalyq damý jónindegi ulttyq agenttiktiń basqarma tóraǵasy Marat Omarov aıtty, dep habarlaıdy QazAqparat.

QR Tehnologııalyq damý jónindegi ulttyq agenttiktiń granttyq baǵdarlamasy 2011- 2016 jyldar aralyǵynda farmatsevtıka, bıotehnologııa jáne basqa da ınnovatsııalyq salalar boıynsha jalpy somasy 12,2 mlrd teńgeni quraıtyn 328 jobanyń iske qosylýyna muryndyq bolǵan.

Sonymen qatar, 2016 jyly 66 jobaǵa 1,9 mlrd teńge jumsady. Belgili bolǵandaı, granttar arqyly júrgizilgen atalmysh jobalardyń arqasynda 2 773 jumys oryny ashylypty.

Alaıda, bıyldan bastap agenttik grant úmitkerlerine qoıylatyn talaptardy kúsheıtip, ınnovatsııalyq jobalardy usynýdyń erejelerin qaıta qaramaq.

Marat Omarovtyń aıtýynsha, negizgi ózgerister agenttik pen ótinish berýshi arasyndaǵy  tehnologııa qunynyn  birlese qarjylandyrýdaǵy tepe-teńdikti qaıta qaraýǵa qatysty bolmaq. Bul kórsetkish buryn 80 de 20 paıyz deńgeıinde  bolyp, shyǵynnyń aýqymdy bóligin agenttik ótep kelgen. Budan bylaı kórsetkish - 50 de 50 paıyz.  Jıyntyq tabys úsh jyldyń ishinde jobanyń qunyn jabýy kerek.

«Atalǵan bastamany engizýdiń ózindik sebebi bar. Biz buryn ótinish berýshilerdiń Tehnologııalyq damý jónindegi ulttyq agenttikke kelgen sapasyz portfelderin baqylap otyrdyq. Endi ótinish berýshiniń  táýekel etý jaǵdaıyn teń bólemiz. Adam óz qaltasynan shyǵatyn qarjysymen táýekel etip, jobanyń jarty qunyn ózi salsa, budan alǵa ilgerileýshilik baıqalady, demek, sapa da joǵary. Joba ıesi 80 paıyz grant alǵan kezde, ol eshqandaı qaterge bas tikpeıdi. Sol úshin biz táýekeldi teń bólip, joba qunynyń bir bóligin ótinish berýshiniń ózine qaldyramyz», - dedi Marat Omarov XII Innovatsııalyq kongresstiń baspasóz máslıhatynda sóılegen sózinde.

 Talaptardyń kúsheıtilýine qaramastan, úsh aıdyń ishinde, tamyzdan qazanǵa deıingi aralyqta agenttik grantyq jobaǵa qatysýǵa nıet bildirýshilerden  200 ótinish qabyldapty.

Jobalardy saraptamadan ótkizý jumystarynyń áli de jalǵasyp jatýyna baılanysty qarjylandyrýǵa qansha qarajat jumsalatyny  ázirge aıtylǵan joq. Onyń esesine, ótinsh berýshilerdiń ınnovatsııalyq jobalaryna memleket bólgeli otyrǵan qarjynyń somasy belgili boldy.

«Jalpy soma - 2,8 mlrd teńge. Jobalardyń saraptamasyn júrgizip jatyrmyz, jyl sońyna qaraı jobalarǵa qansha jumsalatyny jónindegi málimetter belgili bolmaq. Ázirge aıtarym, usynylyp otyrǵan jobalardyń sapasy óte jaqsy», - dedi basqarma tóraǵasy.