Innovatsııalyq jobalarǵa arnalǵan grant alýdyń 3 ólshemi

ASTANA. QazAqparat - «Tehnologııalyq damý jónindegi ulttyq agenttigi» AQ-nyń basqarma tóraǵasy Marat Omarov Ortalyq kommýnıkatsııalar qyzmetinde ótken baspasóz máslıhatynda ınnovatsııalyq jobalarǵa arnalǵan granttardy alýdyń 3 ólshemi týraly aıtyp berdi, dep habarlaıdy QazAqparat.

«Bizde negizgi úsh ólshem bar. Birinshiden, tehnologııa zamanaýı bolýy tıis. Ekinshiden, onyń ónerkásipte qoldanylý faktisi bolǵany jón. Buǵan qosa, ol eksporttyq áleýeti bar ónimdi óndirýge baǵyttalǵan bolýy kerek», - dedi Marat Omarov.

Sonymen qatar ol elimizde jumys istep turǵan kásiporyndardy jańǵyrtý protsesine kómek berý qajettigin atap ótti jáne agenttiktiń negizi jumysy dál osy baǵytta júrgiziletindigin aıtty.

«Biz jumys istep turǵan kásiporyndarǵa qoldaý kórsetýge basa mán beretindigimizdi aıryqsha aıtqym keledi. Kásiporyndarymyzdyń qazirgi tehnologııalyq damý deńgeıi óte tómen. Bizdiń maqsatymyz - kásiporyndardyń jańǵyrtylýyna járdem berý, qazirgi ýaqytta jumys istep turǵandardy Qazaqstanǵa ákelý. Degenmen otandyq ónertapqyshtardyń da ázirlemelerin ysyryp tastamaımyz. Bizdiń kommertsııalandyrýǵa arnalǵan granttarymyz dál osy baǵytta bolyp otyr», - dedi ol.

Esterińizge sala ketsek, Marat Omarov búgin «Tehnologııalyq damý jónindegi ulttyq agenttigi» AQ elimizdiń Investıtsııalar jáne damý mınıstrligimen birlesip ınnovatsııalyq jobalardy granttyq qarjylandyrýdyń jańa baǵdarlamasyn júzege asyrýdy bastaǵandyǵyn málim etken bolatyn.

Aıta keterligi, granttyq qarjylandyrý baǵdarlamasyn júzege asyrý oń áleýmettik-ekonomıkalyq dınamıkany kórsetýde. Máselen, grant alýshylardyń málimeti boıynsha 2014 jyldan bastap 2017 jyldyń 1-shi jarty jyldyǵy aralyǵynda ınnovatsııalyq granttardy júzege asyrý nátıjesinde 2773 jumys orny qurylyp, 7,6 mlrd. teńgeden astam salyq tólendi jáne 131,4 mlrd. teńgeden astam somanyń ónimi óndirildi.