Innovatsııalyq jobalardyń ǵylymı ózektiligin anyqtaıtyn halyqaralyq keńes qurylady - E.Orynbaev

azannyń 6-sy. QazAqparat /Aıdar Ospanalıev/ - Innovatsııalyq jobalardyń ǵylymı turǵydaǵy ózektiligi men rynokqa tartymdylyǵyn anyqtaıtyn ǵylym men kommertsıalızatsııalaý jónindegi halyqaralyq keńes qurý josparlanyp otyr. Bul týraly búgin «Tehnologııalardy kommertsıalızatsııalaý» jobasyn Astana qalasynda iske qosýǵa arnalǵan sımpozıým barysynda Premer-Mınıstrdiń orynbasary Erbol Orynbaev málim etti.

Onyń aıtýynsha, «Tehnologııalardy kommertsıalızatsııalaý»

jobasy - Qazaqstannyń básekege qabilettiligin arttyrýdaǵy mańyzdy qadamdardyń biri. Elimizde qazan aıynyń 4-nen bastap júzege asyryla bastaǵan jobanyń aıasynda el ekonomıkasy men ǵylymynyń damýyna zor úles qosatyn úlken ǵylymı áleýeti bar jobalarǵa grant bólinedi dep kútilýde. Sonymen qatar ǵylymı jańalyqtar men ekonomıka arasyndaǵy baılanysty arttyratyn tehnologııalardy kommertsıalızatsııalaý ofısi qurylady. Bul shara óz kezeginde otandyq ǵylymı jańalyqtardyń ulttyq, tipti halyqaralyq deńgeıge shyǵýyna yqpal etedi.

«Al ǵylym men kommertsıalızatsııalaý jónindegi halyqaralyq keńeske ǵalymdar men tehnologııalardy kommertsıalızatsııalaý salasyndaǵy mamandar kiredi. Sonymen qatar halyqaralyq materıaltaný ortalyǵy qurylyp, ol materıaldardyń quramyn zertteý baǵytyndaǵy otandyq ǵylymnyń damýyna qomaqty úles

qosyp, qazaqstandyq ǵylymdy jańa damý deńgeıine kóteredi. Materıaldardyń quramyn zertteý sharalary jańa ónimderdiń dúnıege kelýine yqpal etip, olar halyqaralyq tehnologııalar naryǵynda oıyp turyp ornyn alatynyna kámil senemin», dedi Úkimet basshysynyń orynbasary.

Onyń aıtýynsha, Úkimet qazirgi tańda Elbasynyń tapsyrmasymen ekonomıkany dıversıfıkatsııalaý, shıkizatqa táýeldilikten arylý baǵytynda keshendi jumystar júrgizýde. «Búgingi joba osy saıasatty júzege asyrýǵa qosyma kúsh bolady degen úmittemin», dedi E.Orynbaev.