Innovatsııalyq tehnologııalardy damytýda Belarýstan qalyp qoıdyq - depýtat
Májilis depýtaty atalǵan suraq boıynsha QR Premer-Mınıstrine depýtattyq saýal joldady.
«Memleket basshysy óziniń sońǵy Joldaýynda jańa tehnologııalardyń engizilýine erekshe mán berdi. Eske salaıyn, 2013 jyly QR ınnovatsııalyq damýynyń 2020 jylǵa deıingi tujyrymdamasy bekitilgen bolatyn. Memlekettik baǵdarlamanyń ekinshi besjyldyǵyna qaraı, shynynda da ınnovatsııalyq damýǵa qol jetkizemiz degen boljam bar edi. Ókinishe qaraı, olaı bolmady. Aýqymdy bıýdjettik shyǵynnyń esebinen jasalǵan ınnovatsııalyq qurylym ózin-ózi aqtamady», - deıdi depýtat saýalynda.
Onyń aıtýynsha, «Innovatsııalyq tehnologııalar parki» Arnaıy ekonomıkalyq aýmaǵynda 2020 jylǵa deıin 250-350 mln AQSh dollarlyq sheteldik ınvestıtsııa tartý mindeti júktelgen.
«Osy tapsyrmanyń aıaqsyz qalǵanyna kimniń jaýapty ekeni túsiniksiz. AEA ITP-niń qurylymyna ǵana bıýdjettiń 20 mlrd teńgesi ketti. Bizdegi parkti birdeı qaǵıdat boıynsha jumys júrgizetin Belarýstaǵy joǵary tehnologııalardyń parkimen salystyryńyz. Ol eldegi park qazirgi tańda baǵdarlamalyq ónimder men ІT-qyzmetteriniń jahandyq eksporterine aınalyp úlgerdi. 2017 jyly atalǵan parktiń eksporty (192 kompanııa) 1 mlrd dollar kiris ákelgen. 100 mln AQSh dollaryna jýyq tikeleı shetel ınvestıtsııasy tartylǵan. Qazaqstan tipti mundaı kórsetkishke jaqyndaǵan da joq», - deıdi depýtat.
Májilismen sondaı-aq, 2011 jyly qurylǵan TDJUA (Tehnologııalyq damý jónindegi ulttyq agenttik» AQ) 11,5 mıllıard teńgege 316 ınnovatsııalyq grant bólgenin jetkizdi.
«Nátıje baıqalmaıdy. Osyǵan qaramastan, 2017 jyly «TDJUA» AQ-qa 3,7 mlrd teńge bólindi. 2018 jyly taǵy 0,8 mlrd teńge bólý qarastyrylǵan. Jańa ınnovatsııalyq ortalyq ashýǵa bizdiń ekinshi múmkindigimiz joq. Sondyqtan, tájirıbedegi sátsizdikterdi esepke ala otyryp, úzdik álemdik tájirıbelerdi eskerý kerek. Birinshiden, ІT-saktory úshin jeńildikterdi keńeıtip, ekinshiden, jańa ınnovatsııalyq ortalyq ashý kezinde maqsatty tıimdilik kórsetkishterin ázirlep shyǵý kerek», - deıdi ol.