Innovatsııalyq mektepter aldynda úlken mindetter tur - ustaz
Bilim salasynda 35 jyldan astam ýaqyt boıy eńbek etip kele jatqan tájirıbeli basshy-ustazdyń aıtýynsha, Elbasynyń «Nur Otan» partııasynyń HVІІІ sezinde kótergen máseleleri halyq arasynda serpilis týǵyzdy.
Aldymen kópbalaly otbasylarǵa beriletin kómektiń ulǵaıtylatyny málim etildi. Elimizde tórt baladan astam perzent tárbıelep otyrǵan 340 myńdaı otbasy bar eken. Endi, mine, ár balaǵa 21 myń teńgeden beriletin boldy. Bul, burynǵymen salystyrǵanda, edáýir jaqsy kórsetkish.
- Bizdiń mektepte kópbalaly otbasylardan kelip júrgen oqýshylar bar. Sol sekildi úsh muǵalim 4-5 baladan tárbıelep otyr. Sol sekildi bıýdjettik salada tómengi jalaqy alatyn qyzmetkerlerdiń eńbekaqysy kóbeıetini olardy qýantyp tastady. Mysaly, esep qyzmetkerleri, is júrgizýshilerdiń jaǵdaıy jaqsaratyn bolady. Olardyń jubaılary da tómengi jalaqy alyp kelse, endi otbasy tabysy kóbeıedi, - deıdi mektep dırektory.
Elbasy málimdemeleri men jyl saıynǵy Joldaýlarynda bilim salasyna soqpaı ótpeıdi.
Osy oraıda bilim berý mazmunyn jańartýda jumystar jasalyp ta jatyr. Ár óńirde jetekshi bir JOO men 10 kolledjdiń bolýy kerektigi kóńilge qonymdy. Odan ınnovatsııalyq mektepter de tys qala almaıdy. Sonyń ishinde №41 jaratylystaný-matematıka baǵytyndaǵy mektep-lıtseı shákirtteri túrli olımpıadalar men ǵylymı jobalar baıqaýlarynda bilim deńgeıleriniń joǵary ekendigin kórsetip júr.
- Buryn entsıklopedııalyq bilimge mán berip kelsek qazirgi tańda oqý men tárbıeni ushtastyra otyryp, shákirttiń belgili bir pándi tańdap, sony ıgerýine, shyǵarmashylyq deńgeıin kóterýine kúsh salynýda. Aıtalyq, mektebimizge oqýshylar 5-synyptan bastap qabyldanady. Jyl saıyn 25-30-daı túlek mektep bitirse, solardyń 85-87 paıyzy grant ıegeri atanady. Qalǵandarynyń ózi 2-3-kýrsa grantqa kóshedi. Shetelde, ulttyq jáne Nazarbaev ýnıversıtetinde bilim alyp jatqan shákirtterimiz barshylyq, - deıdi osy mektepke 19 jylǵa jýyq ýaqyt boıy basshylyq etip otyrǵan V.Ihsanova.
-Valısa Qujatqyzy, Memleket basshysy úsh tildilikti engizýdi aqylǵa qonymdy júrgizý kerektigin atap kórsetti. ıAǵnı aldymen pedagogtardy daıyndap alý kerek. Úsh aılyq kýrstarda oqytý arqyly tildi meńgertý múmkin emes. Bálkim, shetelden muǵalimder shaqyrý qajet pe, osy jóninde ne aıtar edińiz?
- Iá, bul - muǵalimder arasynda úlken pikirtalas týǵyzyp júrgen másele. Bizdiń mektepte de 9 aılyq kýrstan ótip kelgen úsh muǵalim bıologııa páninen aǵylshyn tiliniń elementteri boıynsha dáris berýde. Taǵy úsheýi kýrsqa barmaqshy. Neshe aılyq kýrs bolsa da, ol adam tildi tolyq meńgere almaıdy. Shetelden shaqyrtýǵa bolar. Degenmen, menińshe, mamandardy JOO-larda osy baǵytqa birinshi kýrstan oqytyp alyp baryp, muny tómennen, satylap engizý durys bolar edi. Sonda sapasy da artar edi.
«Bilim salasyna eńbek jolyn muǵalimdikten bastaǵan jańa mınıstr kelip jatyr. Sondyqtan, «Eskisiz jańa joq», degen, eskiniń izin saqtaı otyryp, mektep isi jańashyldyqpen qolǵa alynsa deımiz. Nazarbaev zııatkerlik mektepterinen bastap qarapaıym bilim oshaqtaryna deıin saraptaı kele, tyń qadamdar qolǵa alynsa, esh artyqtyǵy joq. Úsh tildilikti engizýde, ınnovatsııalyq mektepterdiń ózindik erekshelikterin aıqyndaýda asyǵystyqtarǵa jol berilmeı, osy salanyń maıyn ishken bilikti ustazdarmen birge ata-analardyń da oryndy usynys-pikirleri eskerilse, odan esh utylmas edik», - dedi sóziniń sońynda V.Ihsanova.