Innovatsııalyq baıqaý: Gran-prı ıegerleri qandaı ıdeıa usyndy
Baıqaýdyń bas júldesin "Sredalab" komandasy jeńip aldy. Olar ǵımarattardyń shatyrynda jylyjaılardy salýdy usyndy. Budan bólek, jobaǵa sáıkes, turǵyn úılerdiń aldyńǵy betin shynymen qaptap, onyń ishinde qysta gúlderdi ósirýge bolady.
"Mysaly, turǵyn úılerdiń shatyrlary men fasadtarynda jylyjaı ashsa, ony úıge keletin ystyq sýmen, kún batareıalarymen, ıa bolmasa, jel energııasymen jylytýǵa bolady. Fasadta bolsa, jylýdy úıdiń ózinen alýǵa bolady. Qysta ósimdikter úshin 15-17 gradýs bolsa da jetkilikti", - deıdi jeńimpaz komandanyń ókili Anastasııa Leonova.
Al úshinshi oryn ıegeri Ámir Súleımenov syıaqyǵa alǵan 300 myń teńgesin óziniń onlaın-mektebin damytýǵa jumsamaqshy. Atalǵan portal arqyly ınternet-marketıng, baǵdarlamalaý men veb-dızaınge úırenýge bolady.
"Onlaın-mektep múgedekterge arnalǵan. Men ózim júrip-turýdyń problemasyn jaqsy bilemin. Qazaqstanda múgedekter san alýan qıynshylyqtarǵa tap bolyp jatady. Sodan onlaın-mektepti ashý ıdeıasy oıyma keldi. Sonyń negizinde adam qajetti bilimdi alyp, óz bıznesin asha alady", - dedi Á.Súleımenov QazAqparat tilshisine bergen suxbatynda. Ámirdiń ózi Google, Samsung syndy alpaýyt kompanııalardyń onlaın-akademııalaryn aıaqtap, tıisti kýálikterin alǵan.
Aıta keteıik, baıqaýdyń syıaqy qory 3,3 mıllıon teńgeni qurap otyr. Birinshi-ekinshi oryn alǵandar avtoturaqtardy basqarýdyń mobıldi qosymshasyn jáne qalalyq drenajdy júıelerine arnalǵan texnologııalardy usyndy.