Innovatsııalyq baǵdarlamany júzege asyryp, 7 paıyzdyq ósimge qol jetkizý kerek - Elbasy

ASTANA. 15 sáýir. QazAqparat /Aıdar Ospanalıev/ - «Qazaqstan Respýblıkasy Prezıdentiniń kezekten tys saılaýy táýelsizdigimizdiń 20 jyldyǵyna tartylǵan syı ispettes boldy»,-dedi búgin QR Parlamenti Cenatynyń jalpy otyrysynda birqatar joǵary qyzmetterge kandıdattardy taǵaıyndaýdan keıin sóılegen sózinde Elbasy Nursultan Nazarbaev.

«Osy saılaý arqyly dúnıejúzi taǵy da Qazaqstanǵa kóńil burdy. Bul úlken qýanyshty jaǵdaı. Keshegi Sammıt ótkennen keıin, Azıada ótkennen keıin, sońǵy saılaýdan keıin elimiz jaqsy kóńil-kúıde júrip jatyr. Endi aldymyzdaǵy mindetterdiń barlyǵy belgili. Olar bıylǵy Joldaýda da, «Nur Otan» partııasynyń sezinde de aıtyldy. Aldymyzda kóp maqsattar tur»,-dedi Prezıdent.

Elbasy sózinde ınnovatsııalyq baǵdarlamany júzege asyrmasa bolmaıtyndyǵyn atap kórsetti. «Bizge 7 paıyzdyq ósim kerek. Sol 7 paıyzdyń 4 paıyzyn shıkizat beredi, 3 paıyzyn óndiristi óńdeýden alýymyz kerek. Osy jaǵyn myqtap qolǵa alǵan jón. Eger biz tek shıkizatqa táýeldi bolyp qalatyn bolsaq, munaıy da, gazy da kóp, biraq artta qalǵan el bolamyz. Sondyqtan bizge óte shapshań qımyl qajet. Zaman, dúnıe ózgerip barady. Qalaı bolatynyn jáne ne bolatynyn eshkim de bilmeıdi. Qazir daǵdarysty bireýler bitti dese, endigileri bitken joq deıdi. Taǵy bireýler ol endi bastalyp kele jatyr deıdi. Úsheýi de durys pikir. Al biz osylardyń barlyǵyna daıyn bolýymyz kerek», - dedi Memleket basshysy.