Innovatsııaǵa aqsha salatyn ınvestorlarǵa qoldaý kúsheıedi - Qasym-Jomart Toqaev

ASTANA. QazAqparat – Parlament palatalarynyń birlesken otyrysynda Prezıdent Qasym-Jomart Toqaev ınnovatsııaǵa aqsha salatyn ınvestorlarǵa qoldaý kúsheıetinin atap ótti, dep habarlaıdy QazAqparat tilshisi.

«Meniń saılaýaldy baǵdarlamamda «Ǵylym jáne tehnologııalyq saıasat týraly» zańdy ázirleý týraly bastama kóterilgen. Ázirlenip jatqan zań jobasy ekonomıkanyń damý qısynyn ǵylym men ınnovatsııa negizinde aıqyndaýy qajet. Bıznes-ınkýbatorlar, kommertsııalandyrý ortalyqtary, tehnoparkter men konstrýktorlyq bıýrolar sııaqty ınnovatsııalyq ınfraqurylym qurý baǵytynda jeke bastamalardy qoldaýdyń sóz júzindegi emes, pármendi sharalary qajet. Tabysty sheteldik tájirıbelerdi paıdalaný kerek», - dedi Memleket basshysy.

Prezıdent ınnovatsııalyq jobalardy iske qosýdyń negizgi kózi venchýrlik qarjylandyrý bolýy tıis ekenin atady.

«Sondyqtan otandyq jáne sheteldik ınvestorlardyń jobalarǵa degen qyzyǵýshylyǵyn arttyrý úshin barlyq quqyqtyq jáne qarjylyq máselelerdi sheshý qajet», - dedi Qasym-Jomart Toqaev.