Inklıýzıvti bilim berý týraly úzdik materıalǵa respýblıkalyq baıqaý jarııalandy

NUR-SULTAN. QazAqparat - «Bolashaq» qory jýrnalıster men áleýmettik jeli paıdalanýshylary arasynda ınklıýzıvti bilim berýdi jarııalaý boıynsha úzdik materıalǵa jyl saıynǵy baıqaýdy bastady, dep habarlaıdy QazAqparat.

Konkýrs 5 atalym boıynsha ótkiziledi: televızııalyq jumys, áleýmettik rolık, baspasóz betindegi jarııalanym, ınternet-maqala jáne ınternet- jarııalanym/post.

Ótinimder 2021 jylǵy 1 naýryzǵa deıin qabyldanady. Jeńimpazdardyń esimderi Dúnıejúzilik aýtızm máselesi týraly aqparat taratý kúni, ıaǵnı 2021 jylǵy 2 sáýirde jarııalanatyn bolady.

Konkýrs arqyly uıymdastyrýshylar damý erekshelikteri bar balalardy áleýmettik beıimdeýdiń praktıkasy men sátti tájirıbesin atap ótip, azamattardy ınklıýzıvti bilim berýdiń mindetteri men artyqshylyqtary týraly aqparattandyrý protsesine jýrnalıster men áleýmettik jeli paıdalanýshylardy tartýǵa tyrysady.

Qazylar alqasynyń quramyna belgili jýrnalıster, medıa jetekshileri jáne janashyr azamattar kirdi.

Baıqaýdyń jalpy júlde qory – 1 500 000 teńge.