Іnisiniń qujatymen shekaradan ótpek bolǵan 50 jastaǵy ózbekstandyq ustaldy

NUR-SULTAN. QazAqparat - Shekaradan zańsyz ótpek bolǵan eki azamat ustaldy, dep habarlaıdy QazAqparat Ulttyq qaýipsizdik komıtetiniń shekara qyzmetine silteme jasap.

Aqtóbe shekara jasaǵynyń «Álimbet-avto» bólimshesinde shekarashylar Reseıge ketip bara jatqan avtobýstyń ishinen memlekettik shekaradan jasyrynyp ótpek bolǵan azamatty qolǵa túsirdi. Ol júrgizýshiler demalatyn orynda, kórpeniń astynda tyǵylyp jatqan. 29 jastaǵy Qazaqstan azamatyna elden shyǵýǵa tyıym salynǵan bolyp shyqty. Avtobýs júrgizýshisi de QR Ákimshilik quqyq buzý kodeksi 515-babynyń 2-bóligi boıynsha jaýapqa tartylady.

Taǵy bir osyndaı keleńsiz jaǵdaı Mańǵystaý oblysynda tirkeldi. Beıneý shekara jasaǵy «Nókis - Beıneý» baǵytyndaǵy №647 jolaýshylar poıyzyn tekserý barysynda 1974 jylǵy Ózbekstan azamatynyń tólqujatyn usynǵan jolaýshyny ustady. Tólqujattyń bul azamatqa tıesili emestigin birden ańǵarǵan shekarashylar, teksere kele onyń 1969 jylǵy Ózbekstan azamaty ekenin anyqtady. Al tólqujat onyń týǵan inisiniki bolyp shyqty.