Yńǵaıly, tıimdi: petropavldyq órt sóndirýshiler qutqarý quraldaryn ózderi jasaıdy
Ideıa – Petropavldaǵy № 2 mamandandyrylǵan órt sóndirý bóliminiń bólimshe komandıri Samat Japarovtyki. 15 jyl eńbek ótili bar maman jumysyn qatardaǵy órt sóndirýshiden bastaǵan.
«Túrli shaqyrtýlarǵa baramyz. Keıde órt kezinde esikti buzyp ashýǵa týra keledi. Buryn qıyn bolatyn, sońǵy jyldary jańa esikter, myqty qulyptar paıda bolyp jatyr. Órtengen páterdiń ishinde adam qalsa ár sekýnd sanaýly. Sondyqtan biz de bir orynda turmaýymyz kerek.
Jumystan bos ýaqytta óz qyzmetime baılanysty túrli fılmder kóremin, basqa shet elderde órt sóndirýshilerdiń, qutqarýshylardyń qalaı jumys isteıtini qyzyq qoı. Birde amerıkalyqtardyń qolynda erekshe bir quraldy kórip qaldym. Halligan tool dep atalady eken. Esikterdi ońaı ashady, aıtarlyqtaı zaqym kelmeıdi. Nege bizge osyndaı qural jasap almasqa degen oı keldi», – deıdi Samat Japarov.
Órt sóndirýshi uqsas saımandy jasatý úshin bir jylǵa jýyq temir ustasyn izdeıdi. Aqyrynda taýyp, tapsyrys berip, «hýlıgan» (Halligan Tool) dep atalatyn quraldy jasatyp alady.
«Qoldanyp júrgenimizge úsh jyldaı boldy. Buryn esikti ashýǵa súımen qoldanyp, 5 mınýtqa deıin ýaqytty joǵaltsaq, munymen bir mınýttyń sheshinde esikti, terezeni, avtokólikter esigin, kapottardy syndyrmaı ashýǵa bolady. Qolǵa da jeńil, ustaýǵa da yńǵaıly.
Qazir bizdiń bólimde osyndaı eki qural bar. Ekinshisin Petropavl aýyr mashına jasaý zaýyty jasap berdi. Osy kásiporyn basshylyǵymen sóılestik, kelisim bar, bolashaqta óndiristi qolǵa almaq, – deıdi órt sóndirýshi.
Samat Japarovtyń negizgi mamandyǵy – ekonomıst-zańger. Birneshe jyl túzeý mekemesinde eńbek etken ol, taǵdyrdyń aıdaýymen 2008 jyly órt sóndirý qyzmetine jumysqa ornalasqan. Bul salaǵa kelgenine ókingen kezi joq.