Inflıatsııany tejeıtin qural joq – Oljas Qudaıbergenov

ASTANA. QazAqparat – Qazirgi ýaqytta ınflıatsııany tejeıtin qural joq deýge bolady. Mundaı pikirdi CSI aǵa seriktesi Oljas Qudaıbergenov bildirdi, dep habarlaıdy QazAqparat tilshisi.

«Qazirgi ýaqytta taıaý jyldyń ishinde ınflıatsııany tejeı alatyn qural joq deýge bolady. Sebebi, ınflıatsııanyń basym bóligin syrttan ımporttap otyrmyz», - dedi ol Strategııalyq bastamalar forýmy aıasynda BAQ ókilderiniń saýalyna oraı.

Sarapshy bir jyldan keıin jaǵdaıdyń ózgerýi múmkin ekendigin joqqa shyǵarmady.

«Degenmen, bir jyldan keıin ınflıatsııany tejeýge baǵyttalǵan quraldar sany arta túsýi múmkindigi bar. Eń basty qural – bul ımporttalatyn taýarlardy ózimizde shyǵarý kólemin arttyrý nemese aqsha naryǵyn – paıyzdyq mólsherlemeni, teńge baǵamyn turaqtandyratyn is-sharalar jasaý. Alaıda, bul úshin reformalar júzege asyrylýy tıis», - dedi Oljas Qudaıbergenov.